СЭМҮТ: Орхон аймгийн эмч, мэргэжилтнүүдийг чадавхижуулж байна

Сэтгэцийн эрүүл мэндийн үндэсний төв нь Дэлхийн эрүүл мэндийн байгууллага, Эрүүл мэндийн яамны дэмжлэгтэйгээр Монгол Улсад анхан шатны болон эмнэлгийн мэргэшсэн тусламж, үйлчилгээний түвшинд ажиллаж буй эрүүл мэндийн мэргэжилтнүүдийн чадавхийг бэхжүүлэх сэтгэц, мэдрэл болон донтолтын нөхцөл байдлын талаарх сургалтыг энэ сарын 26-29-нд Орхон аймагт зохион байгуулж байна.


 

Анхан шатны болон эмнэлгийн мэргэшсэн тусламж, үйлчилгээний түвшинд ажиллаж буй эрүүл мэндийн мэргэжилтнүүдийн эмчилгээ, оношлогооны чадавхийг бэхжүүлэх зорилготой уг сургалтад Орхон, Булган аймгийн ЭМТ, ӨЭМТ-ийн эмч, эмнэлгийн ажилтан, сувилагч, нийгмийн ажилтан 35 хүн хамрагдаж буй бөгөөд эдгээр хүмүүс тухайн чиглэлээр сургагч багш болон бэлтгэгдэж буй юм.

Сэтгэц, мэдрэл, донтолтын үеийн нэн шаардлагатай тусламж үйлчилгээний mhGAP хөтөлбөр нь ДЭМБ-ын үйл ажиллагааны нэг хэсэг бөгөөд ялангуяа бага, дунд орлоготой улс орнуудад сэтгэц, мэдрэл, донтолтын тусламж үйлчилгээг сайжруулах ач холбогдолтой юм.

mhGAP багц нь сэтгэлийн хямрал, сэтгэцийн эмгэг, амиа хорлолт, эпилепси, солиорол, донтолтын улмаас үүссэн эмгэг, хүүхэд, өсвөр үеийнхний сэтгэцийн болон зан үйлийн эмгэг, сэтгэцийн эрүүл мэндийн бусад асуудлаас урьдчилан сэргийлэх, удирдан зохион байгуулах арга хэмжээг багтаасан байдаг.