Нийгмийн хөгжилд залуусын оролцоог нэмэгдүүлэх, энэ чиглэлд нийслэлийн зүгээс хамтран ажиллах боломжуудыг бий болгох, залуу үеийн санал, санаачилгыг бодлогод тусгах зорилгоор “4D Youth-For Developed Youth” цуврал уулзалтыг хийж буй. Нийслэлийн Засаг даргын Нийгмийн салбар, ногоон хөгжил болон агаар, орчны бохирдлын асуудал хариуцсан орлогч, Нийслэлийн залуучуудын зөвлөлийн салбар зөвлөлийн дэд тэргүүн З.Төмөртөмөө энэ удаа Хөдөө аж ахуйн их сургууль /ХААИС/-ийн оюутнуудтай /2023.04.04/ уулзлаа.
Уулзалтад мөн Хүнс, хөдөө аж ахуй, хөнгөн үйлдвэрийн дэд сайд М.Ганхүлэг, НИТХ-ын төлөөлөгч, Үндэсний цэцэрлэгт хүрээлэн ОНӨТҮГ-ын захирал Ү.Оюунзул, Нийслэлийн Хүнс хөдөө аж ахуйн газрын Газар тариалан, мал аж ахуйн хэлтсийн дарга Х.Сүхбаатар, Нийслэлийн Мал, эмнэлгийн газрын Мал эмнэлгийн хяналт, эрсдэлийн үнэлгээний хэлтсийн дарга М.Түмэннаст нар оролцов. Түүнчлэн ХААИС-ийн удирдлага, 300 гаруй оюутан оролцон санал бодлоо солилцсон юм.
Нийслэлийн Засаг даргын орлогч, Нийслэлийн залуучуудын зөвлөлийн салбар зөвлөлийн дэд тэргүүн З.Төмөртөөмөө:
-Монгол бол хөдөө аж ахуйн орон. Тиймээс энэ чиглэлээр суралцаж буй та бүхэн улс орныхоо ирээдүйн хөгжилд хувь нэмрээ оруулах нь гарцаагүй. Нийслэлийн хүн амыг эрүүл, чанартай хүнсээр хангах, мөн байгаль орчноо хамгаалах зэрэг амин чухал салбаруудад мэргэжлийн боловсон хүчин дутмаг байна.
Тэгэхээр оюутан залуус та бүхэн суралцахын хажуугаар нийслэлийн харьяа байгууллага, газруудад дадлагажих, хагас цагаар ажиллах бүрэн боломжтой гэдгийг дуулгахад таатай байна. Мөн нийслэлээс хүнс, хөдөө аж ахуйг дэмжих чиглэлд хэрэгжүүлж буй төсөл, хөтөлбөрүүдэд гар бие оролцохыг хүсвэл хэзээд нээлттэй гэлээ.
Тодруулбал, эрүүл хүнсээр өрхийн хэрэгцээгээ хангах, хүнсний ногоо хадгалах, нөөшлөх арга барилд иргэдийг сургах зорилгоор 43 га талбайд хүнсний ногоо тариалах хөтөлбөрт ХААИС-ийн оюутнууд оролцох боломжтойг тэрбээр онцлов. Мөн гарааны бизнес эрхлэгч залуусыг дэмжих төсөлд хамрагдах, Үндэсний цэцэрлэгт хүрээлэн ОНӨТҮГ, Нийслэлийн Хүнс хөдөө аж ахуйн газарт цалинтай дадлагажих, амралтаараа ажиллах зэрэг боломжуудыг танилцуулсан.
Энэ үеэр мөн цагийн ажлын мэдээлэл хүргэх үйлчилгээ, сэтгэл зүйн болон хууль зүйн зөвлөгөөг оюутнуудад хүргэж, сайн дурын хөтөлбөрт бүртгэсэн юм.
Ташрамд дурдахад, “4D Youth-For Developed Youth” цуврал уулзалтыг соёл урлаг, анагаах ухаан, батлан хамгаалахын чиглэлээр суралцаж буй оюутан залуустай хийгээд буй билээ.
НЗДТГ-ЫН ХЭВЛЭЛ МЭДЭЭЛЭЛ, ОЛОН НИЙТТЭЙ ХАРИЛЦАХ ХЭЛТЭС
