УИХ дахь байнгын хороод өнөөдөр хуралдана

УИХ-ын байнгын хороод өнөөдөр хуралдах тов гарсан байгаа. Байгын хороодоос урьтаж 11:00 цагаас УИХ дахь МАН-ын бүлэг хуралдах юм. Мөн прокуророос УИХ-ын 4 гишүүнийг түдгэлзүүлэх санал оруулж ирсэнтэй холбогдуулан Халдашгүй байдлын дэд хороо хуралдах юм.

Аюулгүй байдал, гадаад бодлогын байнгын хорооны хуралдаанаар Иргэний болон аж ахуйн хэргийн талаар эрх зүйн туслалцаа харилцан үзүүлэх тухай Монгол Улс, Бүгд Найрамдах Беларусь Улс хооронд байгуулсан гэрээг соёрхон батлах тухай хуулийн төсөл, Гэмт этгээдийг шилжүүлэх тухай Монгол Улс, Бүгд Найрамдах Беларусь Улс хооронд байгуулсан гэрээг соёрхон батлах тухай хуулийн төсөл, Эрүүгийн хэргийн талаар эрх зүйн туслалцаа харилцан үзүүлэх тухай Монгол Улс, Бүгд Найрамдах Беларусь Улс хооронд байгуулсан гэрээг соёрхон батлах тухай хуулийн төслүүдийг хэлэлцэх юм.

Байгаль орчин, хүнс, хөдөө аж ахуйн байнгын хорооны хуралдаанаар “Зарим газар нутгийг улсын тусгай хамгаалалтад авах тухай” Улсын Их Хурлын тогтоолын төсөл, Ерөнхий хяналтын сонсголын зохион байгуулалтын талаар хэлэлцэх юм.

Төрийн байгуулалтын байнгын хорооны хуралдаанаар “Төрийн захиргааны албан тушаалын зэрэг дэв түүний нэмэгдэл олгох журам батлах тухай” Улсын Их Хурлын тогтоолын төсөл, Монгол Улсын Их Хурлын чуулганы хуралдааны дэгийн тухай хуульд нэмэлт оруулах тухай хуулийн төсөл болон хамт өргөн мэдүүлсэн Монгол Улсын Их Хурлын тухай хуульд нэмэлт, өөрчлөлт оруулах тухай хуулийн төслүүдийг тус тус хэлэлцэх юм.