Монгол Улсын Ерөнхийлөгчийн санаачилгаар зохион байгуулж буй Байгаль орчин, уур амьсгалын өөрчлөлтийн яам, “Усны газар”, “Монгол Улсын Шинжлэх ухааны академи”-тай хамтран “Мөстөл, мөсөн голыг хамгаалъя” уриан дор “ЦЭНХЭР АЛТ” Усны Үндэсний II чуулган /2025.03.21/ Төрийн ордонд боллоо.
Байгаль орчин, уур амьсгалын өөрчлөлтийн сайд С.Одонтуяа: “Ногоон дээвэр аяныг хэрэгжүүлэхээр төлөвлөж байна. Учир нь гэр хорооллын айлууд усаа цуглуулж чадахгүйгээс маш их усыг гадаргуу руу алдаж байгаа. Тухайлбал, нэг удаагийн бороогоор 6000 цистерн усыг шууд урсгаж байна. Энэ нь ямар хор нөлөөтэй вэ гэвэл хөрсний бохирдлыг үүсгэдэг. Ихэвчлэн нүхэн жорлонгийн устай нийлээд урсаад хөрсний бохирдлыг бий болгож байгаа учраас бид нар ногоон дээвэр аяныг хэрэгжүүлэхээр болсон. Энэ хүрээнд айл бүхэн ядаж 200 литр усыг тосооч ээ. Тэр усаараа хашаандаа мод тарих зэргээр хэрэглэх уриалгыг дэвшүүлж байгаа. 2025 ондоо мөн “330 сум хөв цөөрөм аян”-г хэрэгжүүлнэ. Энэ аянд Монголын үндэсний бөхийн холбоо хамтарч ажиллая гэээд санамж бичиг байгуулсан. Ингэснээр бөхчүүд маань өөр өөрийнхөө суманд хөв цөөрөм байгуулах ажилд хамтарч ажиллахаар болсонд бид их баяртай байгаа” гэдгийг онцоллоо.
