Эрүүл мэндийн яамнаас Ерөнхий боловсролын сургуулийн сурагчдын 2 дугаар улирлын амралтын хуваарийг “2018 оны 12 дугаар сарын 15-аас 2019 оны 2 дугаар сарын 15-ныг хүртэл хугацаанд тогтоох” саналыг өчигдөр буюу энэ сарын 7-нд Агаарын бохирдлыг бууруулах үндэсний хороонд хүргүүлээ. Ингэхдээ УИХ-ын “Агаарын бохирдлыг бууруулахтай холбогдуулан авах арга хэмжээний тухай” 2018 оны 02 дугаар тогтоолын 7 дахь заалт, Агаарын бохирдлыг бууруулах үндэсний хорооны 2018 оны 9 дүгээр сарын 6-ны өдрийн хурал дээр гарсан гишүүдийн саналыг үндэслэжээ.
Хэрэв энэ саналыг Агаарын бохирдлыг бууруулах Үндэсний хороо дэмжсэн хариу өгвөл БСШУСЯ амралтын хуваарьт өөрчлөлт оруулах юм.
Дэлхийн хэмжээнд томуу, томуу төст өвчний тархвар судлалын нөхцөл байдлын тандалт, судалгаагаар сүүлийн хоёр жилд 1918 онд тохиолдсон томуугийн цар тахлын онцлогтой төстэй шинж тэмдгүүд илэрсэн, мөн шувууны (H7N9, H5N6, H9N2) болон гахайн (H1N2) томуугийн хүний өвчлөлийн тохиолдлын тоо нэмэгдэн бүртгэгдэж байгаа тул томуугийн цар тахлаас сэргийлэх, хариу арга хэмжээний бэлэн байдлыг хангахыг Дэлхийн эрүүл мэндийн байгууллагаас гишүүн орнууддаа зөвлөлөө.
