И-спортын хөгжлийг дэмжих фестивал болно

Олон улсын олимпын хороо /ОУОХ/-ны 2020+5 хөтөлбөрийн зөвлөмжийн дагуу и-спортын долоо хоног анх удаа зохион байгуулагдах гэж байна.

Зургадугаар сарын 22-25-нд Сингапурт болох энэхүү арга хэмжээ нь виртуал спортын хөгжлийг дэмжих зорилготой юм. Дөрвөн өдрийн турш үргэлжлэх фестивалийн үеэр виртуал спортын хөгжлийг олон нийтэд таниулж, хамгийн сүүлийн үеийн технологийн хөгжлийг харуулахаас гадна төрөл бүрийн хэлэлцүүлэг өрнүүлж, боловсролд зориулсан хөтөлбөр хэрэгжүүлж, үзүүлэн тоглолтууд хийнэ.

ОУОХ-ноос и-спортын фестивалийг угтаж цуврал тэмцээнүүдийг дэлхий даяар онлайнаар зохион байгуулахаар төлөвлөж байна. Цуврал тэмцээнүүд гуравдугаар сарын 12-наас тавдугаар сарын 15-ны хооронд үргэлжлэх бөгөөд мэргэжлийн болоод сонирхогч хэн бүхэн оролцох боломжтой. Эдгээр цуврал тэмцээнээс шалгарсан шилдэг 150-200 оролцогч Сингапурт болон финалын тэмцээнд оролцох эрхээ авах юм.

Виртуал тэмцээнийг спортын 11 төрлөөр зохиох бөгөөд одоогоор есөн төрөл нь тодорхой болоод байна. Энэ нь байт харваа, бейсбол, шатар, дугуй, бүжгийн спорт, мото спорт, дарвуулт завь, таеквондо болон теннис.

Хэрэв та өөрийгөө сориод үзэхийг хүсвэл https://olympics.com/en/esports хаягаар зочлоорой.