Бээжин хотноо “Монголын соёлын долоо хоног”-ийг зохион байгуулав
Монгол Улсыг гадаад улсад сурталчлах, цар тахлын дараах үеийн эдийн засгийг сэргээх, аялал жуулчлалыг дэмжих зорилтын хүрээнд “Монголын соёлын долоо хоног” арга хэмжээг Бээжин хотноо Монгол Улсын ЭСЯ-ны “Соёл, мэдээллийн төв”-д 2022 оны 10 дугаар сарын 24-28-ны өдрүүдэд зохион байгууллаа.
Тус арга хэмжээг Монгол Улсаас БНХАУ-д суугаа Элчин сайд Т.Бадрал нээсэн бөгөөд Монголын Үндэсний урлагийн их театрын уран бүтээлчид цахимаар мэндчилгээ дэвшүүлж, морин хуурын дөрвөл, хөөмий болон цамын бүжгийг сонирхуулав.
Тав хоног үргэлжилсэн “Монголын соёлын долоо хоног”-ийн үеэр Монголын нэрт уран бүтээлч, уран барималч Б.Дэнзэн уран бүтээлийн үзэсгэлэнгээ гаргав. Үзэсгэлэнгийн үеэр монгол үндэсний уламжлал, соёл, урлаг, соёлын бүтээлч үйлдвэрлэлийг олон нийтэд танилцууллаа. Мөн Монгол Улсад үйлдвэрлэсэн бараа, бүтээгдэхүүнийг сурталчлах, аялал жуулчлалыг хөгжүүлэх, бизнес, хөрөнгө оруулалтын орчныг танилцуулах арга хэмжээг зохион байгуулж, монголч эрдэмтэн судлаачдын уулзалтыг зохион байгуулав.
Энэхүү цуврал арга хэмжээнд Хятадын төр, хувийн хэвшлийн байгууллагуудын төлөөлөл, иргэд, гадаадын 200 орчим дипломат төлөөлөгчийн газрын ажилтнууд, тус хотод оршин суудаг монгол иргэд оролцлоо.
