Нийгмийн хариуцлагаар манлайлагч Эрдэнэт үйлдвэр

“Эрдэнэт үйлдвэртээ баярлалаа…” гэдэг үгийг  үйлдвэрийн ажилтан бүр хэлэхийг хүсдэг болов уу. Сэтгүүлчийн хувьд, “Буянтай бор уулынхаа хишгийг хүртэх хувьтай хүмүүс шүү, бид…” гэх үгийг их ажлын ард эгэл даруухан оршдог баялаг бүтээгч олон хүний амнаас сонсож явлаа. Эрдэнэт үйлдвэр нийгмийн хариуцлагын чиглэлээр хэрэгжүүлж буй цогц бодлогын үр шим, өгөөжийг хүртээгүй ажилтан үгүй. Хамгийн сүүлийн жишээ нь, үйлдвэрийн ажилчдад зориулсан 1000 айлын орон сууцны “Уурхайчин” хорооллын цогц хөтөлбөр. Үүний инженерийн шугам сүлжээ, зам талбай, тохижилтыг Эрдэнэт үйлдвэр өөрийн хөрөнгөөр шийдэж буй нь үйлдвэрийн ажилчдад зах зээлийн үнээс хямд, тохь тухтай орон сууцанд амьдрах нөхцөлийг бүрдүүллээ.Түүнчлэн зорилтот бүлэгт чиглэсэн олон талын дэмжлэг, тусламж, хөнгөлөлт бий. Энэ талаар Эрдэнэт үйлдвэрийн ажилчид,  ахмад ажилтан, тамирчны төлөөлөл ийн ярьж байна.   

Эрдэнэт үйлдвэрийн хишгийг хүртээгүй нэг ч Монгол хүн үгүй…

Хүний нөөцийн хэлтсийн дарга асан, ахмад ажилтан  Д.АДЪЯА: Эрдэнэт үйлдвэр биднийг ажиллаж байх үеэс л  ажилтнууд, ахмадууд, залуучууддаа  чиглэсэн олон сайхан дэмжлэг туслалцаа үзүүлсээр ирсэн. Одоо ч энэ уламжлал хадгалагдаж  байгаа нь бидэнд таатай сэтгэгдэл төрүүлдэг.  Уул уурхайн салбарт төдийгүй, Улсын хэмжээнд ч ховор нэгэн дэмжлэг бий. Тэр нь ахмадуудад  олгодог тэтгэврийн нэмэгдэл. Сар бүр 162-оос 218 мянган төгрөгийг үндсэн тэтгэвэр дээрээ нэмж авч, энэ сайхан уулын буяныг эдэлж байна. Нөгөө талаас, ахмадуудыг ганцаардлаас хамгаалах,  амьдралын орчныг сайжруулах чиглэлээр соёлын болон спортын ордонтой урлаг соёл,  биеийн тамир дасгал хөдөлгөөний тусгай хөтөлбөр, хуваарьтай ажиллаж хэвшсэн. Цар тахлын нөхцөл байдлаас үүдэн сүүлийн жил гаруй хугацаанд гэртээ байхаас аргагүй байдалд хүрсэн. Ахмадуудад Засгийн газрын болон төрийн дээд шагнал, цол хэргэм хүртэхэд нь ажилтнуудтайгаа яг адилхан урамшуулал дагалдуулан өгдөг. Түүнчлэн, биднийг Олон улсын ахмадын өдөр болон сар шинийн баяраар хүлээн авч, хүндэтгэл үзүүлдэг. Өвдөж зовох үед ч  мөнгө санхүүгийн тусламж үзүүлдэг. Сувилуулахад зориулан жилд 300 мянган төгрөг олгож байна. Зөвхөн ахмадад үзүүлж буй дэмжлэгээс харахад нийгмийн хариуцлагын чиглэлээр ийм гайхалтай  ажиллаж байгаа үйлдвэр Монголд өөр байхгүй л болов уу. Би Нийгмийн хариуцлагын тайлангийн анхны загварыг 2 жил хийгээд тэтгэвэртээ гарсан. Энэ чиглэлээр  Эрдэнэт үйлдвэр 2006, 2007 онд Улсдаа  тэргүүлсэн. Одоо ч мөн тийм л яваа. Хамгийн сүүлд гэхэд л бидний гэрэл цахилгаан, унд усны хамаг зардлыг бүтэн хоёр жил Эрдэнэт үйлдвэр маань хариуцлаа. Ийм болохоор Эрдэнэт үйлдвэрийн хишгийг хүртээгүй нэг ч Монгол хүн байхгүй. Манай ахмадууд үйлдвэрийнхээ дэмжлэг, тусламжид  үргэлж сэтгэл хангалуун явдаг. 

Хөгжих, боловсрох, сайхан амьдрах бүх боломжоор хангадаг

Баяжуулах үйлдвэрийн Шүүн хатаах хэсгийн цахилгаан хийн гагнуурчин Б.АНХБАТ: Би Эрдэнэт үйлдвэрт 10 дахь жилдээ ажиллаж байна. Анхнаасаа, Эрдэнэт үйлдвэрт хүн хөгжих, сурах боловсрох, сайн ажиллах, сайхан амьдрах бүх боломж байгаа гэж итгэж үнэмшин,  өөрийгөө дайчлан, хоёргүй сэтгэлээр ажилласан. Энэ зун төрөлх үйлдвэрт  маань Монгол Улсын баатар цол хүртээсэн. Энэхүү түүхэн үйл явдлын үеэр идэвх санаачилга, үр бүтээлтэй ажиллаж буй таван залуу ажилтанд байр бэлэглэсэн. Тэдний нэг нь би. Энэ бол залуу ажилтан надад өгсөн их итгэл, урам, том хөрөнгө оруулалт. Би туйлаас их баярлаж байна.

Манайх гэр хороололд амьдардаг байсан. Саяхан шинээр ашиглалтад орсон “Уурхайчин-1” хороололд гурван өрөө байрандаа төвхнөөд гэргий, хоёр хүүхэд маань ч бөөн баяр. Ажилд ороод 4 жил гаруй болж байхад минь бүтээмжийн хөдөлгөөнд идэвхтэй оролцож,  санаачилгатай ажилласан гэж Япон улсад туршлага судлах эрхээр шагнасан. Мөн цехийнхээ захиалгаар “Эрдэнэт цогцолбор” дээд сургуульд суралцаж, механикч мэргэжлээр магистрын зэрэг хамгааллаа. Хөгжих, боловсрох, сайхан амьдрах бүх боломжоор хангаж буй Эрдэнэт үйлдвэрийн удирдлага, хамт олонд баярлалаа. Цаашид улам хичээнгүйлэн ажиллаж, шинээр ажилд орж буй залуус дүү нартаа өөрийн мэддэг чаддаг бүхнээ зааж сургана.   

Тохилог байртай болсондоо баяртай байна

Барилга засварын цехийн будаг найруулагч Б.АНУЖИН: Би  ханьтайгаа нэг цехэд  ажилладаг.  Бидэн шиг залуу гэр бүлд Эрдэнэт хотод байр орон сууцны асуудал хүндрэлтэй, түрээс өндөр, олдоц бага, худалдан авахад хэт өндөр үнэтэй байдаг. Яг энэ асуудлыг Эрдэнэт үйлдвэрийн удирдлагууд гярхай харж, ажилтнуудаа ажиллаж амьдрах таатай нөхцөлөөр хангах орон сууцны цогц хөтөлбөр хэрэгжүүлж байна. Манайх энэ хөтөлбөрт хамрагдан орон сууцны “Уурхайчин-1” хорооллын шинэ байрандаа саяхан нүүж орлоо. Энэ нь бидэн шиг  гал голомтоо бадрааж буй залууст маш том боломж юм. Үйлдвэрийн ажилчдад олгодог орон сууцны хөнгөлөлт 12 сая төгрөгийг хоёулаа авсан. Ингэснээр, санхүүгийн хүндрэлд орохгүйгээр урьдчилгаа төлбөрийн ихэнхийг төлсөн. Зах зээлийн үнээс харьцангуй хямд, Баян-Өндөр хайрхны урд, байгалийн сайханд орших тохилог байртай болсондоо бид их баяртай байна. Залуус биднийг тав тухтай, сайхан амьдрах боломжоор хангасан Эрдэнэт үйлдвэртээ баярлалаа. 

Хүүхдээ асарч буй эхчүүдэд сар бүр 500 мянган төгрөг олгодог

Баяжуулах үйлдвэрийн Өөрөө нунтаглах хэсгийн конвейерын машинч Т.ЦЭЦЭГМАА: Би 2006 оны 7-р сард  Баяжуулах үйлдвэрийн Өөрөө нунтаглах хэсэгт  конвейерын машинчаар ажилд орсон. Нөхөр маань ч бас манай хэсэгт ажилладаг. Одоогоор би гэртээ хүүхдээ асарч байгаа. Манай үйлдвэр хүүхдээ 3 нас хүртэл асрах чөлөөтэй байгаа эхчүүдэд сар бүр 500 мянган төгрөгийн тэтгэмж олгодог нь санхүүгийн хямралд орохгүй сэтгэл тайван байж, үр хүүхдээ өсгөхөд их дэм болдог. Мөн Эрдэнэт үйлдвэрт ажилладаг хосуудыг гэрлэлтээ батлуулахад 300 мянга, шинээр төрсөн хүүхдийг 200 мянган төгрөгөөр мялаадаг нь сайхан сэтгэгдэл төрүүлсэн. Эрдэнэт үйлдвэр ажилтнууддаа, сувилуулахад нь зориулан жил бүр мөнгө олгож, рашаан сувилалд амрахад нь хөнгөлөлт үзүүлдэг, гээд л тоочвол их л олон дэмжлэг туслалцааг нь хүртдэгтээ бид баяртай байдаг. 

Миний амжилтад баялаг бүтээгчдийн хөлс, хүч хөдөлмөр шингэсэн

Боксын спортын Олон улсын хэмжээний мастер, Монгол Улсын гавьяат тамирчин М.НАНДИНЦЭЦЭГ: Би долоон жил бокс тоглоод 2010 оноос Эрдэнэт үйлдвэрийн “Хангарьд” спорт клубийн тамирчин болсон. Энэ цагаас миний амжилтын гараа эхэлсэн. Улсын аваргын тэмцээнд 11 удаа түрүүлж, Азийн аваргаас гурван хүрэл, Азийн болон Дэлхийн цомын тэмцээнээс мөнгөн медаль, Монголын боксчин эмэгтэйчүүдээс ДАШТ-ий анхны медалийг эх орондоо авчирсан. Энэ бүх амжилт Эрдэнэт үйлдвэртэй салшгүй холбоотой. Тамирчин хүнд санхүүгийн дэмжлэг хамгаас чухал. Эрдэнэт үйлдвэр надад цалин хөлс өгч,  заал танхим,  амин дэм, хувцас хэрэглэлээр хангаж, зарим тэмцээнд зардлыг минь хүртэл  даадаг байсан. Би Эрдэнэтэд ирээд С.Баттулга багш дээрээ бэлтгэл сургуулилт хийдэг, тэмцээн уралдааны тактикаа ч багштайгаа хамтран боловсруулдаг. Гавьяат тамирчин хэмээх эрхэм алдрын ард Эрдэнэтийн баялаг бүтээгчдийн хөлс, хүч хөдөлмөр шингэсэн гэж би боддог. 

Я.Энхтуяа