Баяр наадмын комисс хуралдав
Шадар сайд У.Хүрэлсүхийн удирдлага дор өнөөдөр Баяр наадмын комисс хуралдлаа. Хуралд зохион байгуулах хорооны гишүүд, салбар хороодын дарга, Нарийн бичгийн дарга нар оролцож, холбогдох асуудлуудаар мэдээлэл хийн, саналаа нэгтгэсэн юм.
Баяр наадмын комиссын өнөөдрийн хуралдаанаар бэлтгэл ажлыг хангах асуудлаар Үндэсний бөхийн салбар хороо, хурдан морины салбар хороо, сурын салбар хороо, урлаг, соёлын арга хэмжээний салбар хороо, тохижилт, засвар, худалдаа, үйлчилгээний салбар хороо, хэв журмын салбар хороо, төрийн ёслолын үйлчилгээний салбар хороо, шагайн харвайн салбар хороо, хэвлэл мэдээллийн салбар хороод ажлаа тайлагнав. Мөн баяр наадмын санхүүжилт, бусад чиглэлээр мэдээлэл өглөө.
Энэ жилийн баяр наадмын нээлт, хаалт болон төрийн хүндэтгэлийн концертод 4000 гаруй хүн оролцуулах юм байна. Наадмаар “Улаанбаатарын үдэш” цэнгүүн, Хүй долоон худаг дахь урлаг, соёлын цэнгүүн, уран зургийн үзэсгэлэн зэрэг уламжлалт арга хэмжээ болохоос гадна Гурван баритоны концерт зохион байгуулахаар төлөвлөжээ. “Шинэ Ерөнхийлөгч долоодугаар сарын 10-ны өдөр тангараг өргөнө. Мөн өдөр Төрийн далбааны өдрийн арга хэмжээ, цэргийн парад болдог учир наадам эхэлсэнтэй адил өдөр болно.
Тиймээс баяр наадмын хөтөлбөрийг зургаадугаар сарын 20-ны өдөр гэхэд бэлэн болгохыг Шадар сайд баяр наадам зохион байгуулах комиссынхонд үүрэг болголоо. Наадмаар үйл ажиллагаа явуулах нийтийн хоол, худалдаа үйлчилгээний тусгай зөвшөөрлийг өмнө нь 3-4 байгууллагаас авдаг байсныг энэ жилээс болиулж, Нийслэлийн мэргэжлийн хяналтын газар өгдөг байхаар шийдвэрлэжээ. Мөн хоолны эрүүл, аюулгүй байдалд хяналт тавихад онцгой анхаарч ажиллахаа салбар хорооны дарга мэдэгдэв.
Төв цэнгэлдэх хүрээлэнгийн засвар шинэчлэлтийн ажил ид өрнөж байгаа бөгөөд стадион тойрсон 18 хаалганы хамгаалалтын төмөр хашлагыг шинэчилж эхэлсэн байна. Хэв журмын салбар хорооны дарга, хурандаа Ганхуяг, Баяр наадмаар ажиллах 86 заалт бүхий хамгаалалтын төлөвлөгөө боловсруулан ажиллаж байна. Төв цэнгэлдэх хүрээлэнгийн ойролцоох аж ахуйн нэгжүүдтэй зөвшилцсөнөөр 1660 машины зогсоол гаргахаар болсон. Наадамчин олон А-гаас У хүртэлх зэрэглэл бүхий зөвшөөрөл авч, наадмын талбайн ойролцоо машинаа тавих боломжтой.
Мөн Хүй долоон худагт 5100 машины зогсоол гаргасан. Баярын үеэр том оврын 702 автобус иргэдэд үйлчилнэ. Хүй долоон худаг руу Рэйлбус үйлчилнэ” гэлээ.
Хуралдаанаар Шадар сайд У.Хүрэлсүх салбар хороодын дарга нарт үүрэг чиглэл өгч, ирэх долоо хоногт Төв цэнгэлдэх хүрээлэн, Хүй долоон худаг зэрэг наадам зохион байгуулагдах газруудаар явж бэлтгэл ажилтай танилцаж, тулгамдсан асуудал байвал газар дээр нь шийдвэрлээд явна гэдгээ онцоллоо.
