Нэгдсэн үндэстэний байгууллагын 2012 оны №66 тоот тогтоолоор жил бүрийн гуравдугаар сарын 20 ныг “Аз жаргалын олон улсын өдөр” болгон тунхагласан юм. НҮБ-нь дэлхийн хүн бүрийн амьдралыг аз жаргалтай байлгахад нэг өдрийн ач холбогдлыг хүлээн зөвшөөрч, манай гарагийн бүх хүмүүсийн хувьд нийтлэг нэгэн мэдрэмжтэй байлгах гэсэн санааг дэмжсэн байна.
Мөн энэ өдөр, өнөөдрийн аз жаргалыг мэдэрч буй нь хүн төрөлхтний нэгэн зорилгын эхлэл юм гэдгийг харуулахыг зорьсон аж. Үүнтэй холбогдуулан үүсгэн байгуулагчид дэлхийн хүн ам, улс орныхоо сайн сайхны төлөө хүчин чармайлт гаргахыг бүх улс орнуудад уриалж байна.
Аз жаргалыг хүн бүр өөр өөрийнхөөрөө тодорхойлдог. Хүмүүс бид аз жаргалыг өчүүхэн жижиг зүйлсээс ч мэдэрч болдгийг мартаж, өөрт байгаа зүйлийн үнэ цэнийг мэдрэхгүй байх нь олон. Харин эрдэмтдийн тодорхойлсноор аз жаргал бол амьдралдаа сэтгэл хангалуун байх, өдөр бүрийг сайхнаар мэдрэх, ойр орчны хүмүүсээс эерэг энерги авах, ямар ч юманд сэтгэл гаргах гээд маш олон зүйлсийн хослол бөгөөд аз жаргалын 50% нь генээс, 40% нь бидний бодол, үйл хөдлөл болон зан аашаас, 10% нь нөхцөл байдлаас шалтгаалдаг байна. Аз жаргал бол ов зальтай байх чадвар бөгөөд амьдралаа хүссэнээрээ удирдах боломж юм.
Аз жаргалыг байнга мэдэрдэг хүмүүсийг мэдэрч чаддаггүй хүмүүстэй харьцуулахад илүү эрүүл байж, осол гэмтлийн дараа хурдан эдгэдэг, урт насладаг, дархлаа сайтай, илүү бүтээлч сэтгэлгээтэй, асуудлыг эерэгээр шийдэх чадвар сайтай, зүрх судасны өвчнөөр өвдөх нь бага, бусадтай илүү сайн харилцаатай байдаг байна. Мөн эрүүл хоолны дэглэмтэй байх нь элбэг.
Аз жаргалаа нэмэгдүүлэхэд шинэ зүйл туршиж үзэх, бусдад туслах, байгаа зүйлсдээ сэтгэл хангалуун байх, харилцаагаа хөгжүүлэх, сайхан бүхнээ бусадтай хуваалцах, өнөөдрөөрөө амьдрах, мэдрэмжүүдээ сайтар ашиглах, жижиг зүйлсэд ч анхаарлаа хандуулж, түүнээсээ аз жаргалыг мэдрэх, дотны хүмүүстэйгээ цагийг өнгөрөөх, ярилцах, бусдад талархлаа илэрхийлэх, дуртай зүйлдээ цаг гаргах нь маш чухал. Мөн сонирхолтой туршилтууд нь таныг илүү аз жаргалтай, гэгээлэг, амьдралд итгэх итгэлтэй болгож, стресс, бухимдал, сэтгэл гутралыг багасгадаг. Аз жаргалын гол түлхүүр нь зөвхөн өөрийгөө анхаарах биш, бусдад анхаарал халамж тавих юм.
Иймээс хүн бүр хувиа хичээсэн хүслээ хаяж, эргэн тойрноо сайн анхаарах хэрэгтэй. Магадгүй яг одоо таны тусламж хэн нэгэнд хэрэгтэй байгаа. Жишээ нь: уурласан найзынхаа зовлонг сонсоод зөвлөгөө өг, өргөж яваа зүйлээ даахгүй байгаа хүнд, зам гарч яваа хүүхдэд, төөрч будилсан нэгэнд таны тусламж хэрэг болж л таараа. Хэн нэгнийг аз жаргалтай байлгаж, инээмсэглүүлнэ гэдэг нь өөрөө жинхэнэ аз жаргал билээ.
