УИХ-ын гишүүн Ж.Батзандан, Л.Болд, Л.Оюун-Эрдэнэ, Т.Аюурсайхан нар өнөөдөр мэдээлэл хийлээ. Тус УИХ-ын гишүүдээс гадна төрийн бус байгууллагын төлөөллүүд энэ сарын 10-ны өдөр бүх нийтийн хамарсан жагсаалыг дахин зохион байгуулах гэж буй талаараа мэдээлэл хийлээ.
Тус мэдээлэл хийх үеэр УИХ-ын гишүүн Т.Аюурсайхан “УИХ-ын дарга М.Энхболдыг ёс зүйн хариуцлага хүлээж УИХ-ын даргаас чөлөөлөгдөх хүсэлтээ гаргахыг бид 2018 оны арваннэгдүгээр сарын 18-нд шаардсан. УИХ-ын гишүүдийн олонх шаардлагаа тавьбал би хүлээж авахад бэлэн гэж М.Энхболд дарга өөрөө хэлсэн. Гэвч олонх шаардлагаа тавихаар хуулиа дагана гээд сууж байна.
2018 оны 12 дугаар сарын 27-ны өдөр МАНАН дэглэмийг устгая уриан дор нэгдэж Төв талбайд жагсаал хийсэн. Харамсалтай нь МАНАН бүлэглэлийнхэн мөнгөөр жагссан, цөөн хэдэн хүн өвлийн зузаан хувцастайгаа ирсэн учир олон болж харагдаж байгаа гэх мэтээр доромжилсон.
Бид 2019 оны нэгдүгээр сарын 10-нд хууль хяналтын байгууллагатай хамтран аюулгүй байдлаа хангаж дахин цуглаан хийнэ. Цаашдаа энэ тэмцлийг үр дүнд хүргэх, жагсаал, цуглаан, суултыг хийх болно. Аймаг орон нутагт байгаа хүмүүс бидэнтэй уялдан нэгэн зэрэг цуглаан хийгээрэй гэж хэлэхийг хүсэж байна” гэв.
Мөн УИХ-ын гишүүн Л.Болд “Өнөөдөр 30-аад төлөөлөл орж ирэх байсан ч танхим өгөөгүй учир орж ирж чадсангүй. Өвлийн хувцастай 3,000 хүн дахиж ирэн Төв талбайг дүүргэнэ. Энэ удаа талбай дээрээс тараад явахгүй. Гэр барьж улс төрийн суулт хийнэ. 200 гаруй хүн өлсгөлөн зарлах хүсэлтээ өгсөн байгаа. Гэхдээ энэ сарын 10-нд өлсгөлөн зарлах хурц хэлбэр рүү орохгүй” гэдгийг энэ үеэр онцлов.
