Сибирийн түймрийн улмаас тоосонцор эрс нэмэгджээ

ОХУ-д гарсан ой, хээрийн түймрийн утааны улмаас манай орны төвийн болон зүүн аймгуудын нутгаар утаан хөшиг тогтож агаарын чанар муудах нөхцөл үүссэн.

Улаанбаатар хотод байрлах агаарын чанарын хяналтын харуулуудын дүнгээс харахад агаар дахь тоосонцрын дундаж агууламж 2021 оны 8 дугаар сарын 4-ний өдрийн 15 цагаас эхлэн эрс нэмэгдэж PM₁₀ тоосонцорын нэг цагийн дундаж агууламж 168мкг/м³, PM_2.5 тоосонцорын нэг цагийн дундаж агууламж 103мкг/м³ хүрсэн байна.

Агаарын чанарын харуулуудын хэмжилтээр PM_2.5 тоосонцорын хоногийн дундаж агууламж 8 сарын 4-ний өдөр 38-69 мкг/м³ байсан нь өмнөх өдрөөс 4-10 дахин их байгаа бөгөөд Хайлааст, 1-р хороолол, 5 буудал, баруун 4 зам орчимд агаарын чанарын стандартад заасан хүлцэх агууламжаас 1-1.4 дахин давсан үзүүлэлттэй байна.

Эх сурвалж: ЦУОШГ