Хүүхдүүдэд халуун хоолоор үйлчлэх төсөл хэрэгжиж эхэллээ

Сүхбаатар дүүргийн 16 дугаар хорооноос сонгогдсон ИТХ-ын төлөөлөгч буюу ИТХ-ын дарга Э.Ганбат, Чех улсад төвтэй “Пипл ин Нийд” олон улсын төрийн бус байгууллагатай хамтран нийслэлийн тэргүүний эрдмийн хөтөч цогцолбор 58 дугаар сургууль дээр хүүхдийн үдийн цай хөтөлбөрийг санаачлан хэрэгжүүлж эхэллээ.

Энэхүү хөтөлбөрт Сүхбаатар дүүргийн 15, 16, 17 дугаар хорооны 2-16 насны 200 гаруй хүүхэд хамрагдаж байгаа бөгөөд хөтөлбөрийг хэрэгжүүлэгчдийн зүгээс хүүхдүүдийн дархлааг дэмжсэн үдийн хоол цайгаар 2 сарын хугацаанд хангахаас гадна дэлхийн 200 гаруй улс оронд тархсан шинэ төрлийн Корона вирусийн халдвартай байгаа энэ цаг үед хүүхдүүдэд зориулж гараа хэрхэн зөв угаах зөвлөмж бүхий ном, гарын саван, шүдний оо, сойзоос гадна угааж хэрэглэж болох амны хаалтыг тус тус бэлэг болгон өглөө.

Энэ арга хэмжээг зохион байгуулахад дүүргийн Онцгой байдлын хэлтэс, Мэргэжлийн хяналтын хэлтсээс өгсөн шинэ төрлийн корона вирусийн эсрэг авч хэрэгжүүлэх зөвлөмжийн дагуу ЕБ-ын 58 дугаар сургуулийн багш ажилчид ажиллаж байгаа юм. Мөн арга хэмжээг зохион байгуулахад санхүүгийн дэмжлэг туслалцаа үзүүлж байгаа Холбооны Бүгд Найрамдах Герман улсын элчин сайдын яаманд дүүргийнхээ иргэдийн өмнөөс баярласан талархсанаа илэрхийлье.

Энэ төрлийн төсөл нь өмнө нь Монгол Улсад хэрэгжиж байгаагүй бөгөөд “Пипл ин Нийд” ТББ, ХБНГУ-ын элчин сайдын яамны зүгээс Сүхбаатар дүүргийн ЕБ-ын 58, Сонгинохайрхан дүүргийн 65 дугаар сургуулийн нийт 500 хүүхдэд дээрх төслийг хэрэгжүүлж байгаа ба энэ төрлийн жишиг загварыг БСШУСЯ-тай хамтран боловсруулахаар ажиллаж байгаа юм байна. Ингэснээр онцгой байдлын үед тус төслийг үндэсний хэмжээнд хэрэгжүүлэх боломжтой болох юм.

Эх сурвалж: СБД