Хөгжлийн бэрхшээлтэй хүүхдийн 50 ортой тасгийг шинээр нээлээ
Олон улсын хүүхдийн эрхийг хамгаалах өдрийг угтан Монгол Улсын Засгийн газрын 2020 оны 43 дугаар тогтоол, 2020 оны 04 дүгээр сарын 30-ний өдрийн А/109 тоот “Журам батлах тухай” тушаалаар хөгжлийн бэрхшээлтэй хүүхдэд чиглэсэн дараах асуудлыг шийдвэрлэлээ.
– Эцэг эх, асран хамгаалагч, харгалзан дэмжигчгүй буюу эцэг эх нь асран хамгаалах чадваргүйн улмаас магадлан итгэмжлэгдсэн Хүүхдийн төрөлжсөн асрамж халамжийн төвд амьдарч байгаа,
– Хүүхдийн тусламжийн 108 утасны үйлчилгээний төв, Хүүхэд хамгааллын хариу үйлчилгээ, түр хамгаалах байранд хамгаалагдаж байгаа,
– Асран хамгаалагч, харгалзан дэмжигч нь тодорхойгүй,
– Хүчирхийлэлд өртсөн 18 хүртэлх насны хүнд хэлбэрийн хөгжлийн бэрхшээлтэй хүүхдүүдэд зориулан, Хөгжлийн бэрхшээлтэй хүний хөгжлийн ерөнхий газрын дэргэдэх Хөгжлийн бэрхшээлтэй хүүхдийн сэргээн засах хөгжлийн төвд 50 ортой хүүхдийн тасгийг шинээр байгуулан , нээлтээ хийлээ.
Уг нээлтийн арга хэмжээнд
- Гэр бүл, хүүхэд, залуучуудын хөгжлийн газрын дарга М.Энх-Амар,
- Гэр бүл, хүүхэд, залуучуудын хөгжлийн газрын дэд дарга Б.Халиун,
- Гэр бүл, хүүхэд, хөгжил, хамгааллын газрын дарга Н.Өлзийхутаг
- Хөгжлийн бэрхшээлтэй хүүхдийн сэргээн засах хөгжлийн төвийн дарга Р.Галбадрах болон албаны бусад хүмүүс оролцлоо.
Нээлтийн арга хэмжээгээр Гэр бүл, хүүхэд, залуучуудын хөгжлийн газрын зүгээс тус төвөөр үйлчлүүлж буй 100 хүүхдэд гарын бэлэг гардууллаа.
Монгол Улсын ХНХ-ын сайдын 2020 оны А/109 тоот тушаалаар “Эцэг эх, асран хамгаалагчгүй, байнгын асаргаа шаардлагатай хөгжлийн бэрхшээлтэй хүүхдэд урт хугацааны тусламж, үйлчилгээ үзүүлэх журмыг баталж, мөн шаардлагатай зардлыг хүүхэд хамгааллын үйлчилгээний зардлаас гаргахаар зохицуулан ажиллаж байна.
Тус төв Хүүхдийн төрөлжсөн асрамж халамжийн төв, Хүүхэд хамгааллын хариу үйлчилгээ, түр хамгаалах байрнаас эхний ээлжинд хүнд хэлбэрийн хөгжлийн бэрхшээлтэй 12 хүүхдийг хүлээн авч эмчилгээ сувилгааг эхлүүлээд байна.
