УОК: Турк, Казахстан улс хоорондын хуваарьт нислэгийг маргаашнаас зогсооно
ЗТХ-ийн сайд Б.Энх-Амгалан: Өнөөдөр 06:00 цагт Улсын онцгой комисс хуралдаж, Улаанбаатар хот, аймаг сумаас гарах болон орох, хот хоорондын зорчигч тээвэр, орон нутгийн хуваарьт нислэг, галт тэрэг, хувийн тээврийн хэрэгслийн хөдөлгөөнийг 2020 оны гуравдугаар сарын 10-ны 07:00 цагаас гуравдугаар сарын 16-ны 07:00 цаг хүртэл зогсоох шийдвэр гарсан.
Үүнтэй холбоотойгоор 06:00 цагийн байдлаар АТҮТ-өөс авсан мэдээллээр тухайн үед замд орон нутаг руу 22 тээврийн хэрэгслээр 550 зорчигч явж байсан. Орон нутгаас нийслэлийг чиглэн 21 тээврийн хэрэгслээр 521 зорчигч явж байсан. Тэдгээр иргэнийг тухайн очих газарт нь хүргэх шийдвэрийг гаргасан. Харин түүнээс хойш хөдөлгөөнийг хязгаарласан юм.
Авто замын боомтоор ОХУ-д зорчих Монгол Улсын иргэн, ОХУ-аас Монгол Улсад зорчих гадаадын иргэн, харьяалалгүй хүний хөдөлгөөнийг гуравдугаар сарын 29-ний өдрийг хүртэл түр зогсоох шийдвэр гаргасан.
Дээрх хугацаанд ОХУ-аас эх орондоо ирэх хүсэлт гаргасан монгол иргэд болон Монголоос ОХУ-аар дамжин гарах хүсэлтэй гаднын иргэдийг тусгай журмаар улсын хилээр нэвтрүүлнэ.
Улаанбаатар-Эрхүү-Улаанбаатар, Улаанбаатар-Москва-Улаанбаатар чиглэлд аялах галт тэрэг болон орон нутгийн бүх чиглэлийн галт тэрэгний хөдөлгөөнийг гуравдугаар сарын 28-ны өдрийг хүртэл түр зогсоолоо. Ингэснээр 10-нд Улаанбаатараас хөдлөх Улаанбаатар-Эрхүү чиглэлийн 303-р галт тэргийг буцааж гаргахаар шийдвэрлэлээ.
Агаарын тээврийн хувьд Турк, Казахстан улсын хоорондын хоёр талын хуваарьт нислэгийг гуравдугаар сарын 11-ны 06:30 цагаас 2020 оны гуравдугаар сарын 28-ны өдрийг дуустал түр зогсоож байна.
Харин авто замын боомтоор ОХУ-д зорчих Монгол Улсын иргэн, ОХУ-аас Монгол Улсад зорчих гадаад улсын иргэдийг гуравдугаар сарын 29-ний өдрийг хүртэл нэвтрүүлэхгүй байх шийдвэр гаргалаа. Мөн Улаанбаатар-Эрхүү-Улаанбаатар, Улаанбаатар-Москва-Улаанбаатар чиглэлийн галт тэрэгний хөдөлгөөнийг гуравдугаар сарын 28-ны өдрийг хүртэл түр зогсоож байна. Ачаа тээвэр хэвийн явна
