УИХ-ын гишүүн О.Цогтгэрэл эрхэмсэг ноён Жерард Браунли тэргүүтэй төлөөлөгчдийг Монгол Улсад айлчилж буйд баяртай байна хэмээгээд, 2025 оны 02 дугаар сард УИХ дахь АН-ын бүлгийн гишүүд Шинэ Зеланд Улсад айлчлах үеэр тус улсын парламентын гишүүд халуун дотно хүлээн авсанд дахин талархал илэрхийлэв.
Мөн Монгол, Шинэ Зеланд улсууд парламентын ардчиллыг эрхэмлэдэг гэдгийг тодотгоод, тус улсын парламентын туршлагаас суралцаж, ил тод байдал, хяналт, иргэдийн оролцоог нэмэгдүүлэхийг зорьж буйгаа илэрхийлсэн юм.
Эрхэмсэг ноён Жерард Браунли манай хоёр орны харилцаа хөдөө аж ахуй, төсөл хөтөлбөр хэрэгжүүлэх чиглэлээр амжилттай хөгжиж ирснийг дурдаад, ардчилсан тогтолцоог бэхжүүлэх асуудлаар харилцан туршлага судалж ирснийг тодотголоо.
Уулзалтын үеэр сонгуулийн холимог тогтолцооны давуу тал, тулгарч буй сорилт, парламентад суудалтай намуудын онцлог, хоёр улсын парламентын төстэй болон онцлог талуудын талаар санал солилцов.
Уулзалтад УИХ дахь Монгол-Шинэ Зеландын парламентын бүлгийн дарга С.Эрдэнэболд, УИХ-ын гишүүн А.Ганбаатар, Г.Ганбаатар, Б.Жаргалан, Х.Тэмүүжин нар оролцлоо хэмээн Улсын Их Хурлын Хэвлэл мэдээллийн газраас мэдээллээ.
