“Хүрээ тулга” сургуулийн сурагчид байгаль орчны сургалтад хамрагдлаа

Дэлхий дахинд дотоод орчны агаарын чанарын асуудал анхаарал татах болсон. Учир нь ихэнх хүмүүс хоногийн 24 цагийн 22 цагт нь гэр, сургууль, оффис зэрэг битүү орчинд байж, өдрийг өнгөрүүлдэг болохыг судалгаагаар тогтоожээ. Тиймээс дотоод орчны агаарыг цэвэршүүлж, хүчилтөрөгчийг маш ихээр ялгаруулах тасалгааны цэцгийг ургуулах нь маш чухал асуудал юм.

Тиймээс Ногоон Ази сүлжээ ОУТББ-ын Ойн ахлах инженер Б. Хонгорзул тэргүүтэй тус байгууллагын төлөөлөл болон сайн дурын ажилтан Жан Хана, Ким Юүмин болон Койка-гийн сайн дурынхан хамтран Баянгол дүүргийн тэргүүний сургууль, нийслэлийн ерөнхий боловсролын “Хүрээ тулга” сургуулийн сурагчдад “Comad Eco Edu төсөл: Ургамал ба сэргээгдэх эрчим хүчийг ашигласан боловсрол” нэртэй байгаль орчны сургалтыг /2025.03.25/ зохион байгууллаа.

Сургалт эхлэхээс өмнө зохион байгуулагчид сурагчдын дэлхийн дулаарал, уур амьсгалын өөрчлөлт, сэргээгдэх эрчим хүчийг ашиглах, дотоод орчны агаарын чанарыг сайжруулахтай холбоотой мэдлэгийг сорьж, сургалтын дараа дахин сурсан мэдсэнийг асууж, мэдлэгийг нь бататгасан юм.

Э.Очирдулам

Гэрэл зургийг П.Нарандэлгэр