Баянхангай сумын ЕБС-ийн 9-12 дугаар ангийн сурагчид байгаль орчны сургалтад хамрагдлаа
Дэлхийн дулаарал уур амьсгалын өөрчлөлтийг танин мэдэж мэдлэг, мэдээлэлтэй болох нь түүний нөлөөллийг сааруулах, сэргээгдэх эрчим хүчийг ашиглах нөөц бололцоог нэмэгдүүлэх юм. Ялангуяа өсвөр үеийнхэн энэ төрлийн мэдээлэлтэй болсоноор дэлхий нийтийн болон өөрийн улс орондоо чухал шаардлагатай мэргэжлийг сонгон суралцахад нь нөлөөлөх чухал алхам билээ.
Энэ хэрэгцээ шаардлагын хүрээнд Ногоон Ази сүлжээ ОУТББ-ын мэргэжилтэнүүд болон сайн дурын ажилтнууд Төв аймгийн Баянхангай сумын ЕБС-ийн 9-12 дугаар ангийн 80 сурагчид байгаль орчны сургалтыг /2025.03.18/ зохион байгуулсан юм.
Сургалтыг Ногоон Ази сүлжээ ОУТББ-ын Ойн ахлах инженер Б. Хонгорзул тэргүүтэй тус байгууллагын төлөөлөл болон сайн дурын ажилтан Жан Хана, Ким Юүмин болон Койка-гийн сайн дурынхан явуулав.
БНСУ-ын КОЙКА Олон улсын хамтын ажиллагааны байгууллагын санхүүжилттэй Eco-Edu төслийн хүрээнд зохион байгуулагдсан уг сургалтаар дотоод орчны агаарын бохирдлыг бууруулах зорилгоор тасалгааны ургамал тарих арга барил, нөхөн сэргээгдэх эрчим хүчийг хэрхэн дахин ашиглаж болох талаар мэдээлэл өгөв.
Энэ үеэр Ногоон Ази сүлжээ ОУТББ-ын сайн дурын ажилтан Жан Хана “Ногоон Ази сүлжээнээс Төв аймгийн Баянхангай суманд “Атар хамтын төгөл” ойжуулалтын талбайг байгуулах төсөл хэрэгжүүлж байгаа. Тиймээс бид Койкагийн сайн дурынхантай хамтран Баянхангай сумыг сонгон ЕБС-ийн сурагчдад Eco-Edu төслийн сургалтаа хийлээ. Хүүхдүүд тасалгааны цэцэг тарьж, арчилсанаар өрөөний агаарыг цэвэршүүлж, дотоод орчны агаарын бохирдлыг багасгах сургалт явуулж, тасалгааны ургамал тариж, нөхөн сэргээгдэх эрчим хүчийг хэрхэн ашиглаж болохыг харуулсан туршилт хийж үзсэн нь хүүхдүүдэд таалагдсанд баяртай байна” гэлээ.
Баянхангай сумын ЕБС-ийн сурагч Б.Ууганбат “Сургалт надад маш их таалагдлаа. Дэлхийгээ хэрхэн хайрлах тухай ойлгож мэдлээ. Мэргэжил сонгоход ч нөлөөлсөн гэж болно. Сэргээгдэх эрчим хүч ашиглан машин угсрах нь үнэхээр таалагдсан. Ирээдүйнхээ төлөө юу хийж болохыг зааж өгсөн багш нартаа баярлалаа” гэлээ.
Баянхангай сумын ЕБС-ийн сурагч Ц.Хүслэн “Одоогийн цаг үед дэлхийн дулаарлын эсрэг бид юу хийж болох вэ гэдгийг ойлгуулсан энэ сургалтаас ихийг мэдэж авлаа. Солонгос ах эгч нартай хамтраад, манай монгол ах эгч нар маань ийм сайхан сургалт явуулж, үүнд нь оролцсондоо маш их их баяртай байна. Тулгамдаж буй асуудлуудыг хэрхэн шийдвэрлэх талаар ойлголттой боллоо, маш гоё цэцэгтэй үнэхээр баяртай байна. Сурсан мэдсэн зүйлээ ашиглаад ирээдүйдээ хэрэгтэй хүн болохын төлөө хичээх болно. Дэлхийн дулаарал гэдэг нь хүмүүсийн болон байгалийн хүчин зүйлсээс үүсэлтэй. Хүмүүсийн буруутай үйлдэл маш их байгаа. Үүнээс болоод дэлхийн уур амьсгал маш ихээр дулаарч, байгаль маш ихээр гэмтэж байна. Тиймээс байгаль дэлхийдээ хайртай байж, өөрсдийн хийж чадах бүхнээрээ ирээдүйдээ хэрэгтэй зүйл хийгээсэй гэж хүсэж байна. Дэлхийн дулаарлын эсрэг хамтдаа тэмцэцгээе” гэсэн юм.
Дашрамд дуулгахад, “Ногоон Ази сүлжээ” ОУТББ нь уур амьсгалын өөрчлөлтийн нөлөөллийг сааруулах, цөлжилт, хүлэмжийн хийг бууруулахад хувь нэмрээ оруулах зорилгоор 2007 оноос Монголд тасралтгүй үйл ажиллагаагаа явуулж ирсэн. Эдүгээ Архангай, Булган, Дундговь, Төв аймгууд, нийслэл хот зэрэг нийт 9 газрын 850 орчим га талбайд ойжуулалт хийж, орон нутгийн иргэдийн оролцоонд түшиглэн нөхөрлөл, хоршоо байгуулан 150 орчим иргэдийг ажлын байраар хангаж байгаа юм.
Төв аймгийн Баянхангай сумын тухайд 2022 оноос “Атар хамтын төгөл” ойжуулалтын талбайг байгуулж, 100 га талбайд Монгол орны цөлжилттэй тэмцэх ODA /Хөгжлийн албан ёсны тусламж/ төслийн бодлогын хэрэгжилтийн жишиг загвар боловсруулах, хил дамнасан шар шороон шуурга, нарийн тоос тоосонцрын эсрэг шууд хариу арга хэмжээ авах, дэлхийн уур амьсгалын өөрчлөлтийн нөлөөллийг бууруулах болон нүүрстөрөгчийн шингээлтийг нэмэгдүүлэхэд хувь нэмэр оруулахаар хамтран ажиллаж байна.
П.Нарандэлгэр
