Ихэнх нутгаар нойтон цас орж, цасан шуурга шуурна

Цаг уур орчны шинжилгээний газраас гаргасан 10 хоногийн урьдчилсан мэдээгээр 2024 оны арваннэгдүгээр сарын 12-нд Монгол-Алтайн уулархаг нутгаар, 13-нд Алтай, Хангайн уулархаг нутгаар, 14-нд баруун аймгуудын ихэнх нутаг, төвийн аймгуудын нутгийн баруун хэсгээр, 15-нд төв болон зүүн аймгуудын ихэнх нутаг, говийн аймгуудын нутгийн хойд хэсгээр, 16-нд төвийн аймгуудын нутгийн зүүн хэсэг, зүүн аймгуудын нутгийн зарим газраар нойтон цас, цас орж, цасан шуурга шуурна.

Мөн салхи 12-нд Алтайн уулархаг нутгаар, 14-нд баруун аймгуудын нутгаар, 15-нд говь, тал, хээрийн нутгаар, 16-нд нутгийн зүүн хэсгээр секундэд түр зуур 18-20 метр хүрч ширүүсч, нутгийн өмнөд хэсгээр шороон шуурга шуурах төлөвтэй байна.

Иймд иргэд, малчид, тээвэрчид та бүхэн  цаг агаарын мэдээ мэдээллийг цаг тухай бүрт нь  хүлээн авах, мэргэжлийн байгууллагаас өгч байгаа сэрэмжлүүлэг, анхааруулгыг дагах, хол, ойрын замд гарахдаа тээврийн хэрэгслийн бүрэн бүтэн, аюулгүй найдвартай байдлыг хангаж бензин, шатахууны нөөцтэй, найдвартай харилцаа холбооны хэрэгсэлтэй явахыг зөвлөж байна.

Мөн дулаан хувцаслах, баталгаат зам, гүүр, гармаар гарах, салхи шуурганд төөрөх, малтайгаа уруудах эрсдэлээс урьдчилан сэргийлэх, бага насны хүүхдийг малд явуулахгүй байхыг ОБЕГ-аас онцгойлон анхааруулж байна