Иргэн, ААНБ-уудын өгсөн мөнгөн болон бусад хандив нь хоёр тэрбум орчим төгрөг болжээ

Улсын онцгой комисст өнөөдөр буюу 26-нд 19 аж ахуйн нэгж, байгууллагаас нийт 173.909.950 төгрөгийн мөнгөн хандив, нэг иргэн, 3 аж ахуйн нэгж байгууллагаас 17.297.900 төгрөгийн 45 нэр төрлийн бараа, материалын хандивыг ирүүллээ.

Тухайлбал, “Монголын хийн түлшний холбоо” ТББ, түүний гишүүн компаниуд зудад нэрвэгдсэн малчдад эхний ээлжинд 150 ширхэг, мөн Улсын онцгой комиссын орон нутагт үүрэг гүйцэтгэж байгаа баг бүрэлдэхүүнд тус бүр нь 200 мянган төгрөг буюу нийт 32 сая төгрөгийн үнэ бүхий иж бүрдэл, хийн тоног төхөөрөмжийг хүлээлгэн өгсөн юм.

Мөн “Монголын ачаа тээврийн ассоциаци” ТББ-ын 50 гаруй гишүүн компаниас нийгмийн хариуцлагын хүрээнд  малчдад өвс тэжээл хүргэх,  цасанд боогдсон зам даваа нээхэд зориулж Улсын онцгой комисст болон  Өмнөговь аймгийн Онцгой байдлын газарт тус бүр 15 сая буюу 30 сая төгрөгийн хандивыг гардууллаа.

Малчдад туслах хандивын аян энэ сарын 20-аас эхэлж, өнөөдрийн байдлаар /2024.02.26/ 28 иргэн, 45 аж ахуйн нэгж, байгууллагын 1.345.055.987 төгрөгийн мөнгөн хандив, нэг иргэн, 12 аж ахуйн нэгж, байгууллагын 579.347.900 төгрөгийн бараа, материалын хандив буюу нийт 1.924.403.887 төгрөгийн хандив тусламж цугласан байна.