Чита хотын Титовская толгод дээр үд дундын ялалтын буудлага хийв

ОХУ-ын Өвөр байгалийн хязгаарын нийслэл Чита хотын Титовская толгод дээр Аугаа их Эх орны дайны ялалтын 81 жилийн ойд зориулагдсан ялалтын буудлага хийх ёслолын ажиллагаа /2026.05.09/ боллоо. Ажиглалтын тавцан дээр Аугаа их Эх орны дайны ахмад дайчид, дайны хүүхдүүд, тусгай цэргийн ажиллагаанд оролцогчид, засгийн газрын албан хаагчид, аюулгүй байдлын албан хаагчид, лам хуврагууд, Суворовын кадетууд, Залуу армийн цэргүүд болон иргэд цугларсан юм.

Энэ үеэр ОХУ-ын баатар Цыдыпов Балдан Баирович “Энэ өдөр бид Аугаа их Эх орны дайны үеэр олон үндэстний ард түмнийхээ агуу гавьяаг дурсаж байна. Та бүхний хийсэн бүхний төлөө ахмад дайчдын өмнө гүнээ мэхийн ёслож байна. Та нар байгаагүй бол бид амар тайван амьдарч, хүүхдүүдээ өсгөж, амьдралаас таашаал авч чадахгүй байх байсан. Өнөөдөр, 81 жилийн дараа танай ач, зээ нар тусгай цэргийн ажиллагааны тулалдааны талбарт тулалдаж, байлдааны даалгавраа нэр төртэй биелүүлж байна. Тус бүс нутгийн оршин суугчид, Чита хотын ард түмэн болон бүх эх орон нэгтнүүддээ амар тайван тэнгэр, хурдан ялалт хүсье” гэлээ.

Нэмэлт мэдээлэл хүргэхэд, Чита хотод 2023 оноос Өвөр байгалийн хязгаарын захирагчийн санаачилгаар үд дундын буудлагыг нэвтрүүлжээ. Ингэхдээ Үндэсний баяр ёслол, дурсгалын өдрүүд болох Ялалтын өдөр, Оросын өдөр, Эх орноо хамгаалагчдын өдөр, Дэлхийн 2-р дайны төгсгөлийн өдөр, Үндэсний эв нэгдлийн өдөр, мөн Чита хотыг “Хөдөлмөрийн эрэлхэг зоригийн хот” цол хүртсэн өдөр энэхүү үд дундын буудлагыг хийдэг уламжлалтай болсон байна.