Монгол Улс Анхдугаар Үндсэн хуулиа баталж, эрх чөлөө, тусгаар тогтнолоо баталгаажуулан Бүгд Найрамдах Улсаа тунхагласны түүхт 100 жилийн ой 2024 онд тохионо. Энэхүү түүхэн ойг угтан Монгол Улсын Их Хурлаас зохион байгуулж буй ажлуудын нэг болох “Үндсэн хууль – 100 жил” парламентын мэтгэлцээний Үндэсний аварга шалгаруулах тэмцээн юм.
Үндсэн хуулийн мэдлэгийг батжуулж дэлгэрүүлэх, Үндсэн хуулиа сахидаг хүмүүнлэг иргэний ардчилсан нийгэм цогцлооход түлхэц болох, оюутан залуусаар дамжуулан хууль дээдлэх ёсыг олон нийтэд түгээн дэлгэрүүлэх зорилготой уг тэмцээн Монгол Улсын Их Хурлын дарга Г.Занданшатарын ивээл дор Монголын мэтгэлцээний нэгдсэн танхим ТББ-тай хамтран зохион байгуулагдах бөгөөд 2023 оны 12 дугаар сарын 09, 10-ны өдрүүдэд Төрийн ордонд болно.
Тус тэмцээн хоёр үе шаттай явагдах ба нэгдүгээр үе шат болох “Үндсэн хууль – Тусгаар тогтнол 100” парламентын мэтгэлцээний үндэсний аваргын сорилго тэмцээн энэ сарын 18-нд Монгол Улсын Их Сургуулийн хоёрдугаар байранд зохион байгуулагдсан бол залуучуудын оюуны спортын энэхүү арга хэмжээний хоёрдугаар шатанд 13 Их, дээд сургуулиудын шилдэг 48 баг оролцоно гэж Улсын Их Хурлын Хэвлэл мэдээлэл, олон нийттэй харилцах газраас мэдээлэв.
