Насанд хүрэгчдийн ур чадварын судалгааны багтай уулзав
БШУ-ны сайд Л.Энх-Амгалан Олон улсын эдийн засгийн хамтын ажиллагааны байгууллагын Олон улсын суралцагчдын үнэлгээний хөтөлбөр буюу PISA, Бага насны хүүхдийн судалгаа буюу ELCS, Насанд хүрэгчдийн ур чадварын түүвэр судалгаа буюу PIAAC судалгааны багийн төлөөлөлтэй уулзлаа.
Монгол Улс PISA 2022 үнэлгээг 4 дүгээр сарын 11-нээс 5 дугаар сарын 14-ний хооронд амжилттай зохион байгуулсан бөгөөд үнэлгээний үр дүн 2023 онд гарч, олон нийтэд танилцуулах юм. Монгол Улс насанд хүрэгчдийн ур чадварын түүвэр судалгааны дараагийн циклд хамрагдах хүсэлтэй байгаагаа энэ үеэр илэрхийллээ. Энэ судалгаагаар төгсөгчдийн ур чадварын түвшинг олон улстай харьцуулах, боловсрол болон хөдөлмөрийн зах зээлийн нийцэл, ур чадварын зөрүүтэй байдлын учир шалтгааныг илрүүлж, бодлогын шийдлийг тодорхойлох боломж бүрдэх юм.
Мөн Монголын боловсролын салбарт үр дүнд суурилсан санхүүжилтийн тогтолцоог нэвтрүүлж байгаатай холбогдуулан багшийн ачааллыг багасгах зорилгоор дотоодын үнэлгээг олон улсынхтай уялдуулан нэгтгэх чиглэлээр хамтран ажиллах санал дэвшүүлж тус байгууллага хамтран ажиллах боломжтой гэж үзэж буйгаа илэрхийллээ.
Мөн өнөөдөр олон улсын хүний эрхийн “Human Right Watch” байгууллагаас ирүүлсэн хүсэлтийн дагуу Боловсрол, шинжлэх ухааны сайд Л.Энх-Амгалан тус байгууллагын төлөөлөгчидтэй уулзлаа. Монгол Улсад хүүхдийн сурч, хөгжих эрх, тэр дундаа 5 настай хүүхдийг сургуулийн өмнөх боловсролд бүрэн хамруулах чиглэлээр Засгийн газраас хэрэгжүүлж буй арга хэмжээний талаар уулзалтын үеэр ярилцаж, туршлага хуваалцсан байна.
