Монгол Улс дахь НҮБ-ын системийг тэргүүлэх Суурин зохицуулагчаар Нидерландын иргэн Яап ван Хиердэнийг томилжээ. Ноён ван Хиердэн нь хөгжлийн асуудал, хүмүүнлэгийн болон энх тайвныг бэхжүүлэх чиглэлээр, ялангуяа салбар байгууллага, алба, төсөл хөтөлбөрийг удирдан, зохион байгуулах төдийгүй стратеги, бодлого төлөвлөлт, үйл ажиллагаа, менежмент болон зохицуулалтын чиглэлээр удирдах түвшинд 30 гаруй жил ажилласан туршлагатай нэгэн юм байна. Тэрбээр 2025 оны нэгдүгээр сараас эхлэн Монгол дахь НҮБ-ын системийн байгууллагуудыг нэгдсэн удирдлагаар хангаж, зохицуулахаар ажиллана.
Монгол Улсад томилогдохоосоо өмнө ноён ван Хиердэн нь Микронезийн холбооны улсын Понпей арал дахь НҮБ-ын анхны Суурин зохицуулагчийн алба хашиж, Палау, Маршаллын арлууд, Науру, Кирибати зэрэг хэд хэдэн орныг давхар хариуцан ажиллаж байв. Эрх үүргийнхээ хүрээнд тэрбээр НҮБ-ын Удирдлагын багийг тэргүүлж, улс орнуудын хөгжлийн зорилгуудыг хэрэгжүүлэхэд нь дэмжлэг үзүүлэхэд чиглэсэн үйл ажиллагааг зохицуулж, уялдааг хангах, оновчтой болгоход анхаарч ирсэн аж.
Дээрх албанд томилогдохоосоо өмнө 2018-2021 онд Афганистан дахь Хүмүүнлэгийн тусламж, хөгжлийн байгууллага (Cordaid), 2013-2016 онд Филиппин, Камбож дахь НҮБ-ын Төслийн үйлчилгээний алба, 1995-2013 онд Бангкок, Копенгаген, Нью-Йорк, Куала Лумпур дахь НҮБ-ын Бүсийн төвийн НҮБ-ын Төслийн үйлчилгээний алба, 1994 онд Бангкок дахь НҮБ-ын Хөгжлийн хөтөлбөр болон 1991-1993 онд Сьерра-Леон дахь НҮБ-ын Хөрөнгийн хөгжлийн сан зэрэгт алба хашжээ.
Нидерланд Улсын иргэн ноён Яап ван Хиэрдэн нь Вагенингений их сургуулийн Хөдөө аж ахуйн эдийн засгийн магистрын зэрэгтэй бөгөөд эхнэр, дөрвөн хүүхдийн хамт амьдардаг байна.
