Мэргэжилтнүүд БНСУ-ын усны салбарын туршлагатай танилцана

Байгаль орчин, аялал жуулчлалын яам, НҮБ-ын Тогтвортой хөгжлийн газар, ЮНЕСКО-ийн Усны аюулгүй байдал, тогтвортой менежментийн олон улсын төв, Солонгосын К-Water компанитай хамтран энэ сарын 9-15-ны өдрүүдэд БНСУ-ын Сөүл хотод “Усны нөөцийн нэгдсэн менежмент”-ийн сургалтыг зохион байгуулж байна.

Энэхүү сургалтад Байгаль орчин, аялал жуулчлалын яам, Усны газар, Орхон аймгийн Байгаль орчин, аялал жуулчлалын газар, Улаанбаатар хот болон хөдөө орон нутагт үйл ажиллагаа явуулж буй 17 усны сав газрын захиргаадын төлөөлөл болох 21 мэргэжилтэн оролцохоор /2023.04.09/ БНСУ-ын Сөүл хотыг зорив.

“Усны нөөцийн нэгдсэн менежмент” сэдэвт сургалт нь “Монгол улсын Тогтвортой хөгжлийн зорилт 6”-ын хэрэгжилтийг хангахад дэмжлэг үзүүлэх, БНСУ-ын усны салбарт хэрэгжүүлж буй бодлого, түүний хэрэгжилттэй танилцах, харилцан мэдээлэл солилцож, Монгол Улсын усны салбарт хамтарч хэрэгжүүлэх төсөл, хөтөлбөрийг тодорхойлох юм.

Тус сургалт нь БНСУ-ын усны салбарт хэрэгжүүлж буй “Гол мөрний арчилгаа, менежментийн тухай ойлголт, түүний хэтийн төлөв”, “Гол мөрний дэд бүтцийн засвар үйлчилгээ, менежмент”, “Уур амьсгалын өөрчлөлтийн эсрэг үерийн менежментийн төлөвлөгөө”, “Гангийн бэлэн байдал, гангийн менежментийн хяналт” зэрэг агуулгын хүрээнд явагдаж, сургагч багшийг бэлтгэнэ.

Сургалтад хамрагдаж буй мэргэжилтнүүд маань сургалтын явцад БНСУ-аас усны салбарт хэрэгжүүлж буй туршлага, хэрэгжилтийн явц, үр дүн, усны томоохон барилга байгууламжтай танилцаж, сургалтын хүрээнд олсон мэдлэг мэдээллээ бодитоор харж танилцан, бататгах боломж олгож байгаагаараа ихээхэн ач холбогдолтой юм.

Эх сурвалж: БОАЖЯ