Сүхбаатар сумын иргэдэд газар хөдлөлтийн чичирхийлэл мэдрэгджээ

Сүхбаатар аймгийн Сүхбаатар сумын “Шинэбулаг” гэдэг газар /аймгийн төвөөс зүүн зүгт 40 км, сумын төвөөс баруун хойд зүгт 73 километрт энэ сарын 16-ны өдрийн 12:46 цагт 4.4 магнитудын хүчтэй газар хөдлөлт болжээ.

Газар хөдлөлтийн тухай мэдээллийг ШУА-ын Одон орон геофизикийн хүрээлэнгээс 12:54 цагт цахим шуудангаар Онцгой байдлын газарт ирүүлсэн байна.

Улмаар тус сумын Засаг даргын Тамгын газрын дарга болон тухайн газар нутагладаг малчдаас тодруулахад газар хөдлөлтийн чичирхийлэл иргэдэд мэдрэгдсэн бөгөөд учирсан хохиролгүй гэжээ.