Э.Буджав туухай өргөлтийн Дэлхийн аварга боллоо

БНЭУ-ын Нийслэл Шинэ Дели хотноо 2022 оны аравдугаар сарын 27-31-нд зохион байгуулж буй Туухай өргөлтийн дэлхийн аварга шалгаруулах тэмцээнд нийт 18 орны 250 гаруй тамирчин оролцож байна.

Энэхүү тэмцээнд Монгол Улсаас дэд ахлагч Энхбаатарын Буджав 68 кг жинд түлхэлттэй өргөлтийн төрөлд оролцож, 2022 оны Дэлхийн аварга боллоо.

Тэрбээр Үндэсний Батлан хамгаалахын их Сургуулийн Ерөнхий цэргийн ангид 2017-2018 онд суралцаж байгаад ОХУ-ын Кострома хотод Цацраг, хими, биологийн зэвсгээс хамгаалах цэргийн академид гурав дахь жилдээ суралцаж байгаа юм.

Түүний амжилтаас дурьдвал, 2018 онд Зэвсэгт хүчний “Туухай” өргөлтийн аварга шалгаруулах тэмцээнээс хоёр хос хүрэл медаль, мөн тэмцээнээс 2021 онд хоёр хос мөнгөн медаль хүртэж байжээ. Түүнчлэн ОХУ-д суралцаж байх хугацаандаа туухай өргөлтийн спортоор тууштай хичээллэсний үр дүнд 2022 онд “Туухай” өргөлтийн Ази тивийн аварга шалгаруулах тэмцээнээс 68 кг-ийн жинд хос мөнгөн медаль, Олон улсын ” Цагаан шөнө” тэмцээнээс алтан медалийг хүртэж байсан аж.