Залуучуудын хөгжлийг дэмжиж байна
“Эрдэнэт үйлдвэр” ТӨҮГ-ын Залуучуудын хөгжлийн зөвлөл /2022.04.12/ хуралдаж, Ерөнхий захирал Х.Бадамсүрэнд үйл ажиллагаагаа танилцууллаа. Тус зөвлөл өнгөрсөн оны тавдугаар сард Ерөнхий захирлын тушаалаар байгуулагдсан бөгөөд залуучуудын хөгжил оролцоог дэмжих, эрхийг хамгаалах, шийдвэр гаргах түвшинд залуучуудын оролцоог нэмэгдүүлэх, тэдний үзэл бодлыг сонсох, санал санаачилгыг дэмжих, залуучуудын үнэлэмж, өрсөлдөх чадварыг нэмэгдүүлэх зорилготой аж.
Тус зөвлөлийг Ерөнхий захирлын Санхүү, эдийн засаг хариуцсан орлогч Д.Үүрийнтуяа ахалж, Хөрөнгө оруулалт, худалдан авах ажиллагааны бодлогын газрын дарга Б.Бямбадагва дэд даргаар ажиллаж, цех нэгжийн удирдлагууд, залуучуудын төлөөллөөс бүрдсэн 15 хүний бүрэлдэхүүнтэйгээр зохион байгуулагдан ажиллаж байна. Түүнчлэн тус зөвлөл дүрмээ баталж, салбар зөвлөлөө байгуулснаар 23 бүтцийн нэгжийн 125 залуу энэхүү зөвлөлд харьяалагджээ.
Ерөнхий захирал Зөвлөлийн үйл ажиллагаатай танилцаж, залуусын төлөө хийхээр төлөвлөсөн ажилд нь өөрийн санал, зөвлөмжөө өгөв. Мөн Залуучуудын хөгжлийн зөвлөлийн хуралдааны үеэр Эрдэнэт үйлдвэрийн удирдлагууд Ил уурхайн Бульдозерын жолооч Э.Мөнгөншагай, Баяжуулах үйлдвэрийн Цахилгаан ба хийн гагнуурчин Б.Анхбат, Баяжуулах үйлдвэрийн тээрмийн машинч Б.Болдбаатар, Автотээврийн цехийн Хүнд даацын машины жолооч Р.Энхболд, Засвар механикийн заводын Тоног төхөөрөмжийн засварчин Ш.Гаанжуур нарт “Уурхайчин-1” орон сууцны хорооллын гурван өрөө байрны Үл хөдлөх хөрөнгийн гэрчилгээг нь гардуулан өглөө. Эрдэнэт үйлдвэрт идэвх санаачилга, үр бүтээлтэй ажиллаж буй дээрх таван залуу ажилтан тус бүрийг Их Монгол Улс байгуулагдсаны 815, Ардын хувьсгалын 100 жилийн ойг тохиолдуулан өнгөрсөн онд гурван өрөө байраар шагнасан юм.
Байрны гэрчилгээгээ гардан авсан залуусын төлөөлөл Б.Анхбатын сэтгэгдлийг сонсоход: “Би Эрдэнэт үйлдвэрт 10 жил ажиллаж байна. Би анхнаасаа, Эрдэнэт үйлдвэрт хүн хөгжих, сурч боловсрох, сайн ажиллах, сайхан амьдрах бүх боломж байгаа гэж итгэж үнэмшин, өөрийгөө дайчлан, хоёргүй сэтгэлээр ажилласан. Өнөөдөр бид Эрдэнэт үйлдвэрийнхээ буян заяа, үр шимийг хүртэж, байрныхаа гэрчилгээг гардан авлаа, сэтгэл тун өндөр байна. Энэ бол залуу ажилтан надад өгсөн их итгэл, урам, том хөрөнгө оруулалт. Би туйлаас их баярлаж байна. Манайх гэр хороололд амьдардаг байсан. Шинээр ашиглалтад орсон “Уурхайчин-1” хороололд гурван өрөө байрандаа төвхнөөд гэргий, хоёр хүүхэд маань ч бөөн баяр.
Эрдэнэт үйлдвэрийн үе тэнгийн залуус, дүү нартаа хандаж, ажилдаа чин сэтгэлээсээ хандаж, зорилготой, тэмүүлэлтэй хичээнгүй байгаарай. Хичээж, сайн ажиллавал хөдөлмөрөө үнэлүүлж сайхан амьдрах боломж дүүрэн бий гэдгийг хэлье. Эрдэнэт үйлдвэрийн удирдлага, хамт олонд маш их баярлалаа. Цаашид улам хичээнгүйлэн ажиллаж, шинээр ажилд орж буй залуус, дүү нартаа өөрийн мэддэг чаддаг бүхнээ зааж сургана” гэв.
