Барилгын тусгай зөвшөөрөл олгох үйл ажиллагааг өнгөрсөн долдугаар сарын 1-нээс цахимжуулсан. Энэ талаар Барилгын хөгжлийн төвийн инженер Н.Энхжаргалаас тодрууллаа.
-Барилгын үйл ажиллагааны тусгай зөвшөөрлийг цахимаар олгож эхэлснээс хойш нийт хичнээн аж ахуйн нэгж цахим системд хандаж, тусгай зөвшөөрлөө аваад байна вэ. Системийн хандалтын тухайд та мэдээлэл өгөхгүй юу?
-Монгол Улсын Засгийн газрын 2020-2024 оны үйл ажиллагааны хөтөлбөр батлагдсаны дагуу төрийн үйлчилгээг авлига, ашиг сонирхлын зөрчлөөс ангид, ил тод, нээлттэй, түргэн шуурхай хүргэх зорилгын хүрээнд Барилгын хөгжлийн төвөөс Барилгын нэгдсэн мэдээллийн системийг хийж гүйцэтгэлээ. Одоогоор төслийн нийт гүйцэтгэл 95 хувьтай явж байна. Барилгын үйл ажиллагааны тусгай зөвшөөрлийг цахимаар авч эхэлснээс хойш нийт 222 хүсэлт ирснээс 147 аж ахуйн нэгжид олгосон байна.
-Систем нь барилгын салбарын хичнээн төрлийн мэдээллийг агуулж байна вэ?
-Барилгын нэгдсэн мэдээллийн систем нь найман дэд системийг агуулсан, иргэн, хуулийн этгээдүүд барилгын салбарын мэдээ, мэдээллийг орон зай харгалзахгүй авах бүрэн боломжтой. Барилгын үйл ажиллагаа эрхлэх тусгай зөвшөөрлийг олгох үйл ажиллагааг цахимжуулсан бөгөөд ААНБ-ууд өөрийн байгууллагын эрхээр нэвтрэн тусгай зөвшөөрлийн хүсэлтийн шийдвэрлэлтийн явц ямар шатанд байгааг хянах, салбарын хүчин төгөлдөр мөрдөгдөж байгаа норм, нормативын баримт бичгийн орон зай харгалзахгүйгээр цахимаар үнэ төлбөргүй харах, татах, хэвлэх бүрэн боломжтой болсон. Мөн барилгын үйл ажиллагааны тусгай зөвшөөрөлтэй ААНБ-уудын мэдээллийн сан, барилгын салбарын инженер техникийн ажилтан болон хөдөлмөрийн аюулгүй байдал, эрүүл ахуйн ажилтны мэдээллийн сан, барилгын салбарын хууль, эрхзүйн баримт бичгийн санг үүсгэсэн.
Энэхүү системийг цаашид үргэлжлүүлэн хөгжүүлэх бөгөөд өнөөдрийн байдлаар Барилгын ажлыг эхлүүлэх, үргэлжүүлэх зөвшөөрөл олгосон, баригдаж байгаа, ашиглалтад оруулсан барилга, байгууламжийн мэдээллийн санг үүсгэх, зөвлөх үйлчилгээ үзүүлэх иргэн, хуулийн этгээдийн бүртгэл, барилгын материалын үйлдвэрлэл болон үнийн судалгаа мэдээллийг цахимжуулах ажлууд хийгдэж байгаа.
Цахим систем дэх мэдээлэл дээр үндэслэн салбарын статистик мэдээ, тайлан гаргах, барилгын салбарт үйл ажиллагаа явуулж байгаа аж ахуйн нэгж, байгууллагуудын чадамжийн цогц судалгаа болон ажиллах хүчний эрэлт, нийлүүлэлтийн судалгааг гаргах боломжтой юм.
–Барилгын нэгдсэн мэдээллийн систем ажиллаж эхэлснээр ямар ач холбогдол, давуу талууд гарч байна вэ?
-Барилгын нэгдсэн мэдээллийн систем нь Үндэсний Дата Төв, УБЕГ, НДЕГ, БШУЯ болон тус яамны харьяа БМТТ, ХНХЯ-ны харьяа ХАБЭМТ, МБҮА гэх мэт төрийн болон төрийн бус байгууллагуудтай хамтран ажиллаж, төрийн мэдээлэл солилцооны “ХУР” систем, танилт нэвтрэлтийн нэгдсэн систем “ДАН”, E-MONGOLIA системүүдээр иргэн, хуулийн этгээдийн зөвшөөрөгдсөн шаардлагатай мэдээллүүдийг татан авч, бодит мэдээлэлд тулгуурлан хөгжүүлсэн систем юм. Тиймээс барилгын нэгдсэн мэдээллийн системд бодит бус мэдээлэл оруулах, өөрийн байгууллагад ажилладаггүй ажилтныг бүртгүүлэх боломжгүй гэсэн үг. Өөрөөр хэлбэл, барилгын тусгай зөвшөөрөл олгоход хүний оролцоог багасгаж, ашиг сонирхлын зөрчлөөс ангид үйлчилгээ үзүүлэх боломжтой болж чадсан. Үүнээс өмнө тусгай зөвшөөрөл хүсэгчийн ирүүлсэн мэдээллийн үнэн зөв байдлыг нягтлах, лавлагаа авах гэх мэт хүний оролцоо их, цаг хугацаа шаардсан үйл ажиллагаатайгаас гадна мэдээллийн үнэн зөв, баталгаат байдал хангалтгүй, бусад мэдээллийн сангийн цахим системтэй холбогдох боломжгүй зэрэг асуудал байсан бол одоо энэ бүхнийг шийдэж чадсан. Төрийн үйлчилгээний тоо, чанар, хүртээмж нэмэгдэж, ил тод, нээлттэй байдал сайжирсан гэх зэрэг олон давуу талтай.
Нөгөө талаас салбарын ажиллах хүчний суурь судалгааг гаргах, эрэлт нийлүүлэлтийг тооцоолж байна. Мөн төрийн бодлого, шийдвэр гаргах үйл явц болон, үзүүлж байгаа үйл ажиллагаанд цахим хэлбэрээр оролцох боломж нэмэгдэнэ.
