Увс аймагт үерийн улмаас хүнд нөхцөл үүсээд байна

2020 оны 07 дугаар сарын 13-ны оройн 19 цагаас 2020 оны 07 дугаар сарын 15-ны өдрийн 11 цаг хүртэл хугацаанд үргэлжлэн орсон усархаг борооны улмаас Увс аймгийн томоохон голууд үерлэж зам сэтэрч, гүүр эвдэрч тээврийн хэрэгсэл зорчих боломжгүй нөхцөл байдал үүссэн учир аймгийн онцгой комисс хуралдаж арга хэмжээ авч ажиллаж байна. Увс аймгийн Улаангом сумын Гашууны гол болон, Түргэн, Сагил сумдын нутаг дэвсгэр Хархираа түргэний голууд үерлэж үерийн түвшин 10-43 см ихэссэн байдалтай байна.

Үер буусны улмаас гүүр сэтэрч, зам хагарч тээврийн хэрэгсэл, ОХУ-аас ирэх ачаа тээвэр зорчих боломжгүй онцгой нөхцөл байдал үүсээд байна. Зам хаагдсаны улмаас Улаанбаатараас ирж Баян-Өлгий аймгаар аялж, амарч байсан 500 гаруй иргэд Сагил, Түргэн сумын нутаг дэвсгэрт усанд боогдсон байдалтай байна. Мөн Улаангом сумын урд чиглэлийн Гашууны гол үерлэж тээврийн хэрэгсэл зорчих боломжгүй байсныг 07-р сарын 14-ны өдрөөс эхлэн тус аймгийн Онцгой байдлын газар, Цагдаагийн газар, Хилийн цэргийн алба хаагчид шуурхай арга хэмжээ авч 4000 гаруй тээврийн хэрэгслийг нэвтрүүллээ.

Аймгийн онцгой комисс шуурхай хуралдаж дараах шийдвэрийг гарган ажиллаж байна

1. Үерийн улмаас Түргэн, Сагил, сумдын нутаг дэвсгэрт байрлах гүүрүүдийн эвдрэл гэмтлийг тогтоох, хохирлыг тооцоог гаргах ажлын хэсгийг байгуулах.
2. Баяр амралтын өдрүүдээр орсон усархаг борооны улмаас үүссэн үерийн аюулд ажилласан зардлын тооцооог гаргаж танилцуулж, шийдвэрлүүлэх.
3. Цаашид эвдэрсэн гүүрийг сэргээн босгох ажилд гарах зардлын тооцоог гаргах ажлын хэсгийг байгуулах.
4. Улаангом сумын үерийн ус зайлуулах суваг шуудууны тооцоо судалгааг гаргах ажлын хэсгийг байгуулж ажиллах.
5. Зам хаасан чиглэлийн Бөхмөрөн, Давст, Сагил, Түргэн зэрэг сумдаас татаж авах жирэмсэн болон хүнд өвчтэй иргэдийн судалгааг гаргах, нэн шаардлагатай тохиолдолд Улсын Онцгой комисст санал хүргүүлж нисдэг тэрэгээр татаж авах ажлыг зохион байгуулах.
6. Увс аймгийн Боршоо боомтоор орох хөдөлгөөнийг түр хязгаарлах саналыг Улсын Онцгой комисс, Засгийн газарт тавьж шийдвэрлүүлэх.
7. Эвдэрсэн гүүрийг засварлах хугацаанд тээврийн хэрэгслийг саадгүй нэвтрүүлэх түр гарам гаргаж, шаардагдах зардлын тооцоо гаргах.
8. Үер усны аюулаас урьдчилан сэргийлэх, сэрэмжлүүлэх ажлыг эрчимжүүлэх, аялал зугаалгаар явж байгаа иргэдэд үерийн ус татартал хөдөлгөөн үйлдэхгүй, аюулгүй байдлаа хангаж ажиллах талаар ухуулга сурталчилгаа зохион байгуулж ажиллах.
9. Үер, усны болон болзошгүй байгал цаг уурын аюулт үзэгдлийн эрсдэлээс урьдчилан сэргийлж сум, албан газар аж ахуйн нэгж байгууллагуудыг ажлын тусгай горимоор ажиллуулж, эргүүл, жижүүр томилж ажиллахыг тус тус даалгахаар шийдвэрлэсэн байна.