Элчин сайд Майкл С.Клечески тэргүүтэй төлөөлөгчид Сэлэнгэ аймагт айлчиллаа

АНУ-аас Монгол Улсад суугаа Онц бөгөөд бүрэн эрхт элчин сайд Майкл С.Клечески тэргүүтэй төлөөлөгчид Сэлэнгэ аймагт албан айлчлал хийлээ. Төлөөлөгчдийг аймгийн Засаг дарга Ш.Оргил хүлээн авч уулзан харилцан санал солилцлоо.

Ноён элчин сайдыг элчин сайдын яамны батлан хамгаалах атташе, дэд хурандаа Филип Лүү, Олон нийттэй харилцах хэлтсийн дарга Роберт Тейт, Иргэн цэргийн харилцааг дэмжих нэгжийн багийн ажилтан Кийл Эллэри нарын албаны хүмүүс дагалдан явлаа.

Сэлэнгэ аймаг “Гадаад харилцааг эдийн засагжуулах нь хөтөлбөр”-ийг хэрэгжүүлэн ажиллаж байгаа бөгөөд энэ хөтөлбөрийн гол зорилго гадаад харилцаа, хамтын ажиллагааны үр өгөөжийг нэмэгдүүлэхэд оршиж байгаа юм.

2018 онд Монгол Улсын Ерөнхий сайд У.Хүрэлсүхийн АНУ-д хийсэн албан айлчлалын үеэр АНУ нь Монгол Улстай “Өргөтгөсөн иж бүрэн түншлэл”-ийн харилцаатай болохыг тогтоосон. Дээрх тогтоол болон аймгийн “Гадаад харилцааг эдийн засагжуулах нь” хөтөлбөр, “Хөрөнгө оруулалтын чуулга уулзалт” зэрэг арга хэмжээний үр дүнд 2 улсын хамтын ажиллагааны үр өгөөж орон нутагт ч хүрч байгаагийн илрэл Сүхбаатар сумын 5 дугаар багийн нутаг дэвсгэрт баригдаж байгаа 50 хүүхдийн хүчин чадалтай цэцэрлэг болж байна.

Уулзалтын үеэр аймгийн Засаг дарга Ш.Оргил “Энэхүү 50 хүүхдийн цэцэрлэг ашиглалтад орсноор тус багийн нийгмийн томоохон асуудал шийдэгдэнэ. Иймд АНУ-ын элчин сайдын яамны шийдвэр эрэлт хэрэгцээ, цаг үеэ олсон хөрөнгө оруулалт болж чадсан” гэдгийг цохон тэмдэглэлээ.

АНУ-аас Монгол Улсад суугаа Онц бөгөөд бүрэн эрхт элчин сайд Майкл С.Клечески “Коронавирусын эрсдлээс улс үндэстнээ хамгаалж байгаа Монгол Улсын бодлого шийдвэр, ард иргэдийг гайхан биширч байна гээд цаашдын хамын ажиллагаа улам бүр өргөжин тэлж, ард иргэдэд үр өгөөжөө өгнө гэдэгт итгэлтэй байгаагаа илэрхийллээ.

Ийнхүү хамтын ажиллагааны нэг хэлбэр иргэд рүү тэр тусмаа хүүхэд багачууд руу чиглэсэн бүтээлч ажил болон хөрсөн дээрээ хэрэгжиж байна.