“Дархлаагаа дэмжье” эрүүл мэндийн өдөрлөг зохион байгуулав

“Эрдэнэт” сувиллын цогцолбор болон үйлдвэрийн ажилчдад халуун хоолны үйлчилгээ үзүүлдэг компаниуд хамтран “ковид-19” халдварын эсрэг “Бүх нийтээрээ дархлаагаа дэмжье” өдөрлөгийг зохион байгуулж байна. Эрүүл мэндийн өдөрлөгийг “Эрдэнэт” сувиллын цогцолборын хоол зүйч Б.Мөнгөнтуяа санаачлан, цех хариуцсан эмч нар оролцож буй аж. Өдөрлөгөөр дархлаа дэмжих олон төрлийн ундаагаар ажилчдад үйлчлэхийн зэрэгцээ хоолны эрүүл ахуй, халдвар хамгаалал, нэр төрөл, үйлчилгээний чанар, хандлага зэрэг чиглэлээр асуумж судалгаа авч байна. Мөн дархлаа дэмжих уламжлалт арга, шим тэжээллэг хүнс хэрэглэх, булуу чөмгөний ясны ач холбогдол, “Эрүүл мэнд-аз жаргал” гэсэн сэдэвтэй гарын авлага, зөвлөмж тараажээ.

Эхний удаагийн өдөрлөгийн үйл ажиллагааг Засвар механикийн завод, Ган бөөрөнцгийн цех, Төрөл бүрийн маркийн авто машины засварын газрын ажилчдад халуун хоолоор үйлчилдэг “Таятан фүүд” компани зохион байгуулж, дархлаа дэмжих дөрвөн нэр төрлийн амин дэмийн ундаагаар өдрийн ээлжийн 700 гаруй ажилчдад үйлчилсэн байна. Тэгвэл өнөөдөр уг өдөрлөгийг Ерөнхий захиргааны нэгдүгээр байр, Цэвэрлэх байгууламж, Хаягдлын аж ахуйн ажилчдад халуун хоолоор үйлчилдэг “Хаан хүнс” компани зохион байгууллаа. Өдөрлөгт дээрх цехийн 1350 орчим ажилтан хамрагдав. Мөн энэ үеэр гар угаах дадлага сургалт явуулжээ.