Дархан хот 2035 онд жишиг хот болох боломжтой
Дархан хотын ерөнхий төлөвлөгөөг 1960, 1985, 2000 онд гурван удаа шинэчлэн баталж байсан бөгөөд цаг үеэ даган дахин төлөвлөлт хийх шаардлага үүсээд байна. Энэ үед Монгол Улсын зөвлөх архитектор, гавьяат барилгачин Я.Шархүүгээр ахлуулсан үе үеийн шилдэг архитектор, инженер, зохиогчдоос бүрдсэн баг “Дархан хотыг 2035 он хүртэл хөгжүүлэх ерөнхий төлөвлөгөө”-г боловсруулжээ.
Уг ерөнхий төлөвлөөний төсөлтэй Барилга, хот байгуулалтын дэд сайд Б.Мөнхбаатар танилцаж, архитекторуудын саналыг сонслоо.
“Дархан хотыг 2035 он хүртэл хөгжүүлэх ерөнхий төлөвлөгөө”-ний төсөлд аймгийн хүн ам 2035 онд 153 мянга, Дархан сумын хүн ам 130 мянга, аймгийн хэмжээнд өрхийн тоо 38 мянга, сумын хэмжээнд 32 мянга 500 хүн амтай болно гэж төлөвлөжээ.
Дээрх төслөөр нийт хүн амын 35 хувь нь буюу 12640 өрх 45 мянган иргэн амины орон сууцанд /хаус, таун хаус/ амьдарна. Харин амины орон сууцанд оршин суугч нэг иргэнд 38-40м2, нэг өрхөд 120-140м2 талбай, нийтийн орон сууцанд оршин суугч нэг иргэнд 21-30м2, нэг өрхөд 75-84м2 талбай ноогдохоор орон сууцны хангамжийг төлөвлөж, ашиглалтад байгаа хуучин сууцанд төлөвлөлтийн шинэчлэл хийж нэг өрхөд ноогдох талбайг томруулж 5700 өрхийн 18800 хүн хуучин орон сууцны хороололд оршин суухаар ерөнхий төлөвлөгөөнд тусгажээ.
Одоогийн байдлаар Төрийн өмчийн 18 цэцэрлэгт 5486 хүүхэд, Хувийн өмчийн 20 цэцэрлэгт 1424 хүүхэд, Ерөнхий боловсролын 22 сургуульд 16659 хүүхэд суралцаж байгаа бол ерөнхий төлөвлөлтийн хугацаанд 13000 хүүхэд цэцэрлэгт, 26000 сурагч сургуульд хамрагдахаар тооцсон байна. Дээрх төслийн багийнхан аймаг, орон нутгийн иргэдээс санал авсны үндсэн дээр ерөнхий төлөвлөгөөг боловсруулсан төдийгүй 2035 он гэхэд жишиг хот, түүнээс цааш Улаанбаатар хотын хэмжээнд хөгжүүлэх зорилт дэвшүүлжээ.
Дархан-Уул аймгийг үйлдвэрийн бүс болгох боломжтойг ч Монгол Улсын зөвлөх архитектор, гавьяат барилгачин Я.Шархүү хэлж байлаа. Нүүрс боловсруулах үйлдвэр, Арматурын үйлдвэр, Барилгын материалын үйлдвэр, Ган төмөрлөгийн үйлдвэр зэрэг хүнд үйлдвэрийн бүс байж болох бөгөөд Дархан суманд сүүний чиглэлийн эрчимжсэн мал аж ахуй, төмс хүнсний ногооны үйлдвэрлэл, үр тариа, үрийн аж ахуй, усалгаатай газар тариалан, сүү, сүүн бүтээгдэхүүний үйлдвэрлэл, мод боловсруулах үйлдвэрлэл, хүлэмжийн аж ахуй, самар боловсруулах цех, зөгийн аж ахуй, гахайн аж ахуй гэх мэт хөнгөн, хүнсний жижиг үйлдвэр хөгжих боломжтой.
БХБ-ын дэд сайд Б.Мөнхбаатар ерөнхий төлөвлөгөөтэй танилцаад Яам, агентлаг, мэргэжлийн холбоод, архитекторуудаас бүрдсэн ажлыг хэсэг гаргахыг үүрэгдлээ.
