Төрийн албан хаагчдын ёс зүйг дээшлүүлэхэд онцгой анхаарахыг зөвлөв
Улсын Их Хурлын гишүүн, Монгол Улсын сайд, Засгийн газрын Хэрэг эрхлэх газрын дарга Л.Оюун-Эрдэнэ Төрийн албаны зөвлөлийн үйл ажиллагаатай танилцаж, тус зөвлөлийн дарга, гишүүдтэй уулзлаа.
Уулзалтын эхэнд Төрийн албаны зөвлөлийн дарга, гишүүд, Ажлын албанаас Төрийн албаны тухай хуулийн өөрчлөлтийн үе шат, шинэ хуулийн зарчим, үзэл баримтлал, төрийн албаны шинэтгэл, төрийн албан хаагчдыг чадавхижуулах асуудал болон НҮБ-ын хөгжлийн хөтөлбөрөөс Төрийн албаны зөвлөлтэй хамтран хэрэгжүүлж байгаа төслийн зорилго, үйл ажиллагааны талаарх мэдээллийг хийлээ.
Мэдээлэлтэй холбогдуулан Улсын Их Хурлын гишүүн, Монгол Улсын сайд, Засгийн газрын Хэрэг эрхлэх газрын дарга Л.Оюун-Эрдэнэ хэд хэдэн асуудлыг онцоллоо.
Засгийн газрын 2019 оны 04 дүгээр сарын 03-ны өдрийн хуралдаанаас өнөөдөр Төрийн захиргааны болон үйлчилгээний албан хаагчийн ёс зүйн дүрэмд өөрчлөлт оруулж, төрийн албан хаагч гадаад улсад мөрийтэй тоглоом, казино тоглохыг хориглох шийдвэр гаргасаныг танилцуулж, төрийн албан хаагчдын ёс зүйг дээшлүүлэхэд онцгой анхаарахыг онцлов.
Түүнчлэн төрийн албан хаагчийг мэргэшүүлэх, улс төрөөс хараат бус, тогтвортой ажиллуулах, төрийн залгамж чанарыг хангуулахаар төрийн албаны шинэтгэлийг 1995-2019 он хүртэл 4 үе шаттай хийжээ. Тиймээс төрийн албаны дараагийн шинэчлэлийг одооноос ярих шаардлагатай. Монгол Улсын төрийн албаны хөгжлийн 5, 6 дахь үе шатны шинэтгэлийн бодлогыг боловсруулж, ирээдүйд төрийн алба ямар түвшинд хүрэхийг тодорхойлох хэрэгтэйг тэмдэглэн хэллээ.
Төгсгөлд нь Танай байгууллагад тэр бүр ажиглагдаад байдаггүй хийчих юмсан гэсэн халуун дулаан уур амьсгал харагдаж байна. Мөн ажилдаа эзэн болж, гадаад, дотоодод сурч мэдсэнээ хэрэгжүүлж, төрийн албан хаагчдыг олон улсын түвшинд хүргэчих юмсан гэсэн оргилуун хүсэлтэй нь мэдрэгдэж байна гээд ажлын амжилт хүслээ.
