Иргэдэд хөнгөлөлттэй үнээр үйлчлэх 47 сувилал

Эрүүл Мэндийн Даатгалын Ерөнхий Газартай гэрээ байгуулсан сувиллуудын жагсаалт гарчээ.

Сувилал нь сэргээн засах болон уламжлалт эмчилгээний тусламж үйлчилгээг хэвтүүлж эмчлэх хэлбэрээр үзүүлдэг байгууллага.

Тус газраас өгсөн мэдээллээр эрүүл мэндийн даатгалын шимтгэл төлсөн хүн дараах сувиллуудаас хөнгөлөлттэй үнээр тусламж үйлчилгээг авах эрхтэй байна.

Тодруулбал иргэн зөвхөн сувиллын тусламж үйлчилгээ авахад 260,000 төгрөг, сувилал болон уламжлалт эмчилгээний тусламж үйлчилгээнд 416,000 төгрөг, сувилал болон сэргээн засахын тусламж үйлчилгээг авсан бол 400,114 төгрөгийн хөнгөлөлтийг Эрүүл Мэндийн Даатгалын Сангаас/ЭМДС/ олгоно.

Заавал ахмад настан гэхгүй шимтгэлээ төлсөн иргэн, малчин, оюутан, сурагч сувиллаас үзүүлэх тусламж үйлчилгээг хөнгөлөлттэй үнээр жилд нэг удаа авах зохицуулалттай.

Энэхүү хөнгөлөлтийг хүүхдүүд, хувиараа эрүүл мэндийн даатгалын шимтгэл төлдөг иргэд ч эдлэх эрхтэй гэж тайлбарлалаа.

0-18 насны хүүхэд, хугацаат цэргийн алба хаагч, тэтгэврээс өөр тогтмол орлогогүй иргэн, ял эдэлж буй ялтны ЭМД-ын шимтгэлийг төрөөс төлдөг ч тусгай зохицуулалтаар сувилалд эмчлүүлэх эрхтэй байна.

ЭМДСантай гэрээ байгуулсан 47 сувилалд явах иргэд өрхийн эмнэлэг, амбулаторийн эмнэлэгт үзүүлсэн байх шаардлага тавигдах аж.

Сувилалд иргэний төлөх төлбөрийн хэмжээ харилцан адилгүй. Өөрөөр хэлбэл иргэн тав тухын буюу люкс өрөөнд орох тохиолдолд сувилал нэмэлт төлбөр авах эрхтэй. Тав тухын нэмэгдэл төлбөрт ЭМДС-гаас хөнгөлөлт үзүүлэхгүйг тодотгов.

Харин ахмадууд 100,000 төгрөг төлж долоо хоног сувилалд амрах нөхцөл Хөдөлмөр, Халамж, Үйлчилгээний Ерөнхий Газарт харьяалагддаг байна.