Тарвага агнаж идсэн иргэн хоёр өдрийн дараа нас баржээ

Говь-Алтай аймгийн Цээл сумын Дэрстэй багт 2023 оны 08-р сарын 29-ний өдөр тарвага агнаж идсэн, идсэн өдрөөсөө хойш 2 хоног халуурч байгаад нас барсан гэх иргэний хэргийг Цагдаагийн байгууллага, мэргэжлийн байгууллагуудтай хамтран шалгаж эхэлсэн байна.

Иймд иргэд тахлын голомт бүхий газарт зорчихгүй байх, ан амьтны түүхий эд, махыг хүнсэнд хэрэглэхгүй байхыг цагдаагийн байгууллагаас сэрэмжлүүлж байна.

Мөн Тарваган тахал өвчнөөс урьдчилан сэргийлэх, тарваганы тоо толгой, тархац нутгийн хэмжээг нэмэгдүүлэх зорилгоор Байгаль орчин, аялал жуулчлалын сайдын 2021 оны А/193 дугаар тушаалаар ахуйн болон үйлдвэрлэлийн зориулалтаар тарвага агнахыг гурван жилийн хугацаанд буюу “2021-2024” хориглосон тул өөрийн болон гэр бүл, бусдын амь нас, эрүүл мэндийг сахин хамгаалж, мэргэжлийн байгууллагуудын зөвлөмжийг дагахыг анхаарууллаа.