Туул гол “онцгой” их бохирдлын түвшинд хүрчээ
![](https://i0.wp.com/newswall.mn/wp-content/uploads/2023/03/333869605_713236977150314_5092326221378584804_n.jpg?resize=780%2C405)
Ус цаг уур орчны шинжилгээний хүрээлэнгээс Улаанбаатар хотын Туул голын дагуух усны чанарын хяналт шинжилгээний цэгүүдэд хөтөлбөрийн дагуу Уубулан, Налайх, Сонгино доод, Хадан хясаа цэгүүдээс 2023 оны нэгдүгээр сарын 11-12-ны өдрүүдэд дээж авч химийн найрлага, чанарын үзүүлэлтүүдийг тодорхойллоо.
Туул голын усанд 2023 оны нэгдүгээр сард хийсэн хяналт-шинжилгээний дүнгээс үзэхэд голын усны цахилгаан дамжуулах чанар хотоос дээш болон хот орчимд 65-85мкСи /см, хотоос доош хэсэгт 874-1100 мкСи/см-т хэлбэлзэж байна.
Туул голын ууссан хүчилтөрөгчийн горим Улаанбаатар хотоос дооших Хадан хясаа цэгийн орчимд Монгол Улсын гадаргын усны стандарт MNS4586:98 дахь хүлцэх агууламжаас 2.3 дахин, биохимийн хэрэгцээт хүчилтөрөгчийн агууламж 25.7-86.9 дахин, аммонийн азот /NH4-/-ын агууламж ХА-аас 29.8 дахин, эрдэс фосфор /P/-ын агууламж ХА-аас 18.2-35.3 дахин давж, онцгой их бохирдлын түвшинд ажиглагдаж байна. Хотоос дээш хэсэгт нитрит азот /NO2/-ын агууламж 14-23 дахин давсан тохиолдол ажиглагдсан байна.
Хаягдал ус цэвэршүүлэх байгууламжууд болох Төв ЦБ 36.2 хувь, Нисэхийн ЦБ 97:1 хувь, Био орон сууц ЦБ 85.5 хувь, Био үйлдвэрийн ЦБ 56.4 хувьтайгаар цэвэршүүлсэн усыг Туул голд тус тус нийлүүлж байна.